Nica bën "rrotacion", Atsina në sulm
E shtuna do të rezervojë një përballje ndryshe në Korçë. Dy skuadra me "pole" të kundërta në klasifikim, do të matin forcat me njëra-tjetrën. Nëse Skënderbeu është në krye dhe pretendon titullin, Kastrioti i vendit të fundit po tenton që të mbledhë pikët e nevojshme për të shpëtuar sezonin dhe mbijetuar në mesin e më të mirëve. Të vendosur para kësaj situate, përgatitjet e krutanëve kanë nisur intensivisht prej fillimjavës, me shpresën që në këtë transfertë më shumë se delikate të mos dalin duarbosh. Trajneri Stavri Nica, pas humbjes me Luftëtarin, nuk e ka lënë skuadrën asnjë ditë pushim, por ka zbritur që të hënën në fushë për të përgatitur sfidën ndaj korçarëve. Gjatë këtyre ditëve, tekniku e ka "shtrydhur" ekipin dhe madje ka guxuar të bëjë "rrotacion" në formacion. Dhe ndryshime që janë vënë re në seancat stërvitore janë disa, ndonëse ende nuk është vendosur përfundimisht se cili do ta nisë nga minuta e parë takimin ndaj kryesuesve të kampionatit. Humbja që nuk pritej ndaj gjirokastritëve, e ka detyruar teknikun durrsak që të ndryshojë skemën e lojës dhe të rifreskojë 11-shen me disa lojtarë të tjerë. Lënia e malazezit Stijepoviç në stol në përballjen me gjirokastritët, duket se nuk ka qenë një zgjidhje e mirë, ndaj në javën e 11-të të kampionatit pritet që mbrojtësi i majtë të rikthehet si titullar. Ndërsa, një lëvizje surprizë shihet te përfshirja në formacion e Çarls Atsina, i cili me shumë gjasa do të udhëheqë majën e sulmit të krutanëve në këtë përballje. Tekniku ka ende disa dilema për mesfushën, por dy seancat që kanë mbetur përpara kësaj sfide, do të sjellin edhe vendimin e tij final. Bujar Balliu