Blofi kushton, Meto: Apolonia është gati për kthesën e madhe
Mesfushori nuk e mendon dështimin në transfertën e Orikumit
Pas barazimit me Tomorin dhe kushteve të vendosura nga administratori Bregu, skuadra fierake ka vijuar me më tepër përkushtim përgatitjet e saj për ndeshjen e radhës. Këtë fundjavë Apolonia do të luajë në transfertë, me debutuesit e Kategorisë së Parë, Orikumi, një ekip simpatik në lojë dhe rezultate gjatë këtyre 7 javëve, çka dëshmohet edhe nga renditja në tabelë, duke ndarë vendet 3-4 me Bylisin e vetëm, 2 pikë larg Besës kryesuese. Ndihen komodë orikasit, ndërsa krejt e kundërta ndodh tek Apolonia, që nuk ka kohë për t'u marrë me të shkuarën, por veç për ndeshjen e radhës, aspak e lehtë për fierakët, paçka se kanë premtuar se do të jetë kjo java e tyre dhe gjithashtu kanë siguruar në analizën e javës së lënë pas se nuk e kanë premtim thjesht për deklaratë.
METO
Një nga futbollistët më me përvojë tek Apolonia, Agim Meto, nuk do të bëjë as kortezi e as "ta pompojë" më kot ekipin, të cilit i përket. "Pjesën e ezauruar të këtij kampionati do të doja ta mbyllja me një shprehje pa koment: mund dhe duhet të merrnim më shumë! Por le të shohim përpara, pasi lojën e shoqëruar me rezultat për ndeshjet që na presin mundemi, jo për çfarë lamë pas. Po punojmë fort për këtë transfertë, me mobilizim total e po aq respekt për kundërshtarin, Orikumi, që ka treguar një model pozitiv dhe po bën një prezantim serioz në këtë debutim. Përvoja ime nuk më lejon deklarime 'pompoze', por kthjelltësi në vlerësim kundërshtari dhe mundësitë që kemi. Të bëjmë të fortin ne? Respekt maksimal për Orikumin, sepse është një ekip që askush nuk e pati menduar në këto nivele, por ne do shkojmë si Apoloni, pa e nënvlerësuar Orikumin, përkundrazi. Ama, unë nuk jam nga ata që deklaroj me bindje se fitojmë me ta, edhe pse për fitore do luftojmë, por do të ishte e pafalshme të dilnim pa pikë", tha Meto. Bujar Rama