Atinga: E kam të vështirë në Shqipëri, ushqimi dhe koha halli më i madh
Ganezi do të bëhet një nga lojtarët më të mirë në prapavijë
Vinsent Atinga, një nga lojtarët e rinj të Tiranës këtë sezon, la vendin e tij për Shqipërinë, me formulën si lojtar i lirë. Futbollisti i ardhur nga Afrika ka folur dje për mediat ganeze, duke prekur temën e jetës së tij të re në Shqipëri. Ish- lojtari i Harts që luan si mbrojtës ka rrëfyer se sa e vështirë ka qenë për të jeta muajt e parë në Shqipëri. “Në fillim për mua ka qenë shumë e vështirë jeta në Shqipëri. Nuk ishte e lehtë, sepse jeta, ushqimi, kultura, madje edhe koha është ndryshe nga Afrika. Jam duke u përshtatur, sidomos me ushqimin dhe kohën. Për momentin mund të them se jam ende i trazuar me këto punë. Duhet të pranoj se shokët e skuadrës po më ndihmojnë shumë me gjuhën gjatë stërvitjes”, thotë Atinga për mediat ganeze. Mbrojtësi, i cili deri tani ka luajtur disa ndeshje me Tiranën, për “Ghanacrusader. com” ka folur për aventurën e tij shqiptare. Sipas ganezit, dëshira e tij është shumë e madhe për të ndihmuar skuadrën e tij të re0 Tiranën, që të fitojë titullin kampion dhe Kupën e Shqipërisë, si dhe për të luajtur të paktën në Champions apo Europa League që për të do të thoshte një “pjacë e madhe” për një skuadër më të mirë europiane.
“Dua që këtë vit me fanellën e Tiranës të fitoj Kupën e Shqipërisë, kampionatin shqiptar. Në kampionatin shqiptar ke mundësi të luash në Europë dhe për këtë qëllim objektivi kryesor i të gjitha skuadrave shqiptare është Europa”, thotë Atinga.
Mbrojtësi ganez ka në “sirtar” edhe një tjetër ëndërr. Dëshiron të jetë mbrojtësi më i mirë i kampionatit shqiptar. “Një tjetër objektiv personal është të shkëlqej këtë sezon. Dua shumë që të bëhem një nga lojtarët më të mirë në mbrojtje të kampionatit shqiptar. Për këtë jam duke punuar shumë fort, ditë pas dite, për të arritur këtë ëndërr”, shton ganezi.
Vinsenti është lojtari i dytë ganez, i cili iu bashkua KF Tiranës, pasi edhe ish- shoku i skuadrës së tij në Afrikë, Harts of Oak, Uinful Kobina kishte firmosur me të njëjtin klub një kontratë trevjeçare. Futbollisti shtatlartë ka luajtur si titullar në Black Stars B, duke fituar kupën “WAFU 2017”, e cila asokohe u organizua në Ganë. Lojtari luajti shumë mirë në sezonin 2016-’ 17, duke u grumbulluar në kombëtaren e vendit të tij dhe duke u aktivizuar në miqësoren që Gana fitoi me Arabinë Saudite. Tirana vjet për herë të parë mori pjesë në Kategorinë e Parë dhe Atinga u soll në Shqipëri për të qenë një nga lojtarët e mbrojtjes, ndonëse nuk ka luajtur gjatë gjithë kohës titullar me bardheblutë.