Turpërimi 5-0, Apolonia mendon hakmarrjen
Fierakët vazhdojnë përgatitjet intensive për ndeshjen e radhës, transfertën ndaj Orikumit. Në fillim të këtij sezoni, të rrallë do të ishin ata që do të dyshonin në fitoren e Apolonisë, por dinamika e gjertanishme e dy skuadrave respektive në kampionat favorizojnë Orikumin, një ekip që ka qëndruar paksa jashtë vëmendjes së medias mbi të gjitha, por edhe të opinionit sportiv. Orikumi as “6 qirinj” nuk i ka ndezur mbi “tortën e datëlindjes” futbollistike dhe befas shfaqet si surpriza më e bukur e Kategorisë së Parë. Ngjitja në këtë kompeticion ka rezultuar “hajmali” fati, për shkak të “nepotizmit” të dy Vllaznive, por skuadra “e heshtur” e Sakajt u sjell në mendje sportndjekësve rastin e Kampionatit Europian 1992, teksa Danimarka (e pakualifikuar) la përmes pushimet ekzotike të ishujve të Greqisë, u bë pjesëmarrëse pas përjashtimit të ishJugosllavisë së kualifikuar dhe nordikët fituan Kupën e Europës! Orikasit janë ambiciozë në projektin e tyre dhe po sfidojnë edhe “vëllanë e madh”, Flamurtarin e Superligës, mbase edhe si paralajmërim që “modeli Kukës” mund të përsëritet... Dëshirë dhe ambicie e tyre! Fakti: një skuadër 5-6 vjeçare si Orikumi, në “habitatin” e vet të pathyeshëm, përballë një Apolonie me histori 93vjeçare.
PËRBALLJA
Krijon përshtypjen e jashtme se është në disfavor të fierakëve. Për nivel krahasimi: Orikumi ka 12 pikë, Apolonia 9; Orikumi në vend të katërt (njësoj me Pogradecin e vendit të tretë), Apolonia në vend të shtatë; Orikumi ka fituar tri nga katër ndeshjet në fushën e vet dhe ka barazuar veç një (1-1 me Besën kryesuese, i vetmi gol i pësuar në “shtëpi”), por edhe Apolonia ka marrë 2 fitore nga 4 ndeshje jashtë Fierit këtë kampionat (Apoloni më e fortë jashtë fushe - fakti grishës për sportdashësit); Orikumi, një nga dy ekipet me mbrojtjen më të mirë (bashkë me Bylisin, 3 gola të pësuar), Apolonia, një nga dy skuadrat me sulmin më të dobët (bashkë me Elbasanin, 4 gola të shënuar). PRECEDENTI
Ka qenë vetëm një miqësore e fillimdhjetorit 2017, kur Orikumi ka fituar plot 5-0 në Fier me Apoloninë, në kohën kur bardhejeshilët drejtoheshin nga trajneri Ndriçim Kashami, që ishte gati të kërkonte gjoba për lojtarët (e deklaruar prej vetë Kashamit pas asaj miqësoreje). Asokohe është dukur si truk i fierakëve për të mashtruar kundërshtarët, por me Orikumin e këtij kampionati, ca më tepër në një ndeshje zyrtare, nuk ka vend për “shaka” të tilla. Sfida e së shtunës pritet me shumë interes nga të dyja ekipet që këtë sezon ka synime të rëndësishme. Bujar Rama