Interi pret Xhenoan, Spaleti: Shansi i Lautaros
Naingolan ndoshta luan rota!ion apo jo, fitojmë për tifozët
Mesazhi, i dhënë drejtpërdrejtë nga " Instagram"-i, ka qenë i qartë. Pak çaste përpara konferencës, në fakt, nga profili i tij social Luçiano Spaleti ka publikuar: "# papushim #forcainter". Sot luhet sfida kundër Xhenoas dhe trajneri nuk ka asnjë dëshirë të ndalë ritmin: "Pengesat ekzistojnë në çdo kënd të kampionatit tonë, - ka nënvizuar Spaleti. - Xhenoa është paraqitur mirë deri tani. Edhe në të fundit me Milanin, ku ndoshta nuk e meritonte humbjen. Ideja jonë është kjo: nuk duhet të themi se jemi të fortë, por ta tregojmë në çdo ndeshje. Nevojitet grinta e duhur për të fituar". Si një lloj detyrimi kundrejt pasionit të madh të tifozëve: "Duhet të jemi një skuadër e fortë, e bukur, që luan futboll të bukur. Që të mund të meritojë gjithë ata tifozë, të cilët priten në numër të madh edhe nesër (sot): thuajse 70 mijë për një ndeshje të këtij niveli është një tregues i rëndësishëm: kjo konsideratë duhet merituar. Ata besojnë më shumë se të gjithë te cilësitë tona dhe ne duhet të jemi në një nivel me ta".
ZGJEDHJE - Naingolan, i riaftësuar, është grumbulluar, por vështirë se do jetë pjesë e ndeshjes: "Po tregon karakterin e tij, është luftëtar edhe kur ka një problem. Sot (dje) zhvilloi më shumë stërvitje sepse duhet ta bënte, ndiente shqetësim, por e duroi. Edhe puna e stafit mjekësor ka qenë e shkëlqyer: e riaftësuan brenda pak ditësh. Nesër ( sot) luan vetëm nëse do jetë e domosdoshme, por 30' i përballon pa problem". Atëherë Spaleti kalon te formacioni, ku Lautaro është gati të marrë një fanellë titullari në vend të Ikardit. Por, trajneri nuk e quan "çlodhje" apo "rrotacion": "Lautaron nuk e harroj, është gjithmonë në
mendimet e mia: ka nivel dhe karakteristika të rëndësishme, e në ndeshje si kjo mund të na japë një ndihmë të madhe. Kemi shumë sfida pranë njëratjetrës dhe një lojtar i nivelit të tij na nevojitet. E nëse luan nuk do të thotë se lashë pushim një tjetër, por thjesht që zgjodha atë. Në fushë zbresin 11, Lautaron në momentin që e zgjedh e konsideroj në nivel të barabartë me Ikardin.
Në Romë zgjodha Zhoao Marion sepse kisha nevojë për cilësitë e tij dhe ai ma shpërbleu, në vend të tij mund të luanin shumë mirë katër lojtarë të tjerë. Besimi im është se problemi qëndron te psikologjia më shumë se fiziku. Këtu nuk duhet thjesht të jesh futbollist, por një profesionist, një lojtar për Interin: është ndryshe".
MAROTA - Në mbyllje është komentuar zëri rreth
një transferimi të mundshëm të Marotës: "E njoh, është profesionist, mund të na japë një kontribut të rëndësishëm. Por, mund të them se këtu tek Interi kemi drejtues që mund të ndihmonin Juventusin, - ka nënvizuar Spaleti. - Më befason dhe më bën të reflektoj fakti që vetëm te Juvja e dinin që do largohej, ndërsa për sa i përket transferimit tek Interi e dinë të gjithë, përveç nesh".