Cungu: I lumtë Vlorës, ndryshoi edhe arbitrin!
“Ulërita te goli i dytë i Flamurtarit, por ishte shumë vonë”
Armando Cungu nuk i kursen “thumbat” për Flamurtarin, ndërsa është shumë i zhgënjyer për mënyrën sesi skuadra e tij i pëson golat. Në prononcimin për “SuperSport” pas ndeshjes, trajneri i Kukësit theksoi se u bënë gabime amatoreske, ndërsa shprehu rezerva për arbitrat, duke ironizuar se vlonjatët i kishin marrë masat në çdo aspekt.
Ndeshja e dytë që skuadra humbet në këtë mënyrë, ndieni keqardhje për mënyrën sesi i pësoni golat?
Mund të gabosh një apo dy herë, por jo gabime amatoreske, duke u dhuruar golat kundërshtarëve. Flamurtari kishte ardhur për të shfrytëzuar goditjet standarde. Te goli i dytë ekipi humbi toruan, por kundërshtari i kishte marrë masat në çdo aspekt, edhe jashtë fushës.
Çfarë nuk shkoi për të gjetur edhe golin e dytë?
Në pjesën e dytë ndryshuam vendosjen. E filluam mirë dhe kishim mundësi të shënonim sërish, duke barazuar. Donjet Shkodra sakrifikoi i dëmtuar. Me lëvizjet që bëmë sakrifikuam edhe Shafik që nuk ka tipare mbrojtëse. Ishim shumë të brishtë edhe mbrapa. Te goli i dytë qendërmbrojtësit tanë dolën në sulm, ndërsa të tjerë ndenjën shumë hapur. Edhe pse ulërita ishte shumë vonë.
Zëvendësimi i Zguros me Krasniqin ishte i detyruar apo lëvizja juaj taktike?
Ishte një lëvizje e imja, sepse Torasa po na vinte shumë në vështirësi në atë krah. Spostova Cuculin, që meriton komplimente për lojën.
Çfarë po ndodh me Rexhinaldon?
Duket që është një ngërç momental. Mund ta kalojë çdo futbollist në botë, sidomos sulmuesit. Ekipi krijoi, pati mundësi. Nuk duhet të dhurojmë golat. Është shumë e dhimbshme të pësosh gola në këtë mënyrë.
Keni menduar për ndonjë ndryshim në mbrojtje?
Situata jonë në mbrojtje është kjo. Maliqi mbrojtës i djathtë luajti i dëmtuar, por për mua ka bërë ndeshje të mirë. Në qendër janë Cuculi dhe Shameti, si dhe Krasniqi e Qaqi. Kemi vetëm Zguron në të majtë, sepse Rrumbullaku është i dëmtuar. Kemi shumë mungesa, por ju lumtë kundërshtarëve.
Në ç’kuptim?
Janë të aftë të ndryshojnë arbitrat dhe të sjellin njerëzit që duan. Arbitrimet kanë qenë korrekte deri te ndeshja me Skënderbeun. Pas kësaj ndeshjeje, arbitrat kanë pasur probleme ndaj nesh. Faulle nuk ka për ne, as kartonë për kundërshtarin. Diçka e çuditshme po na ndodh.