Daja: Lojën e dominuam ne, pres të vazhdojmë me fitore
Trajneri i Flamurtarit, Ilir Daja, është shfaqur mjaft i qetë pas fitores me Kukësin. Për “SuperSport” u shpreh se skuadra e tij e dominoi lojën, duke merituar fitoren. Në fund foli edhe për arbitrat.
Një fitore shumë e rëndësishme, por edhe tepër e vuajtur...
Në pjesën më të madhe të lojës e kemi venë ne në vështirësi kundërshtarin, pothuajse mbi 70 për qind. Në 15 minutat e fundit ka qenë iniciativë e Kukësit, por edhe e jona për ta mbrojtur rezultatin. Merita u takon lojtarëve. Në këto momente është pak e rënduar fusha dhe duhet të sakrifikosh. Shkojmë një hap përpara nga ajo pjesë e parë me Teutën sa i përket lojës që kemi bërë.
Do të jetë ky Flamurtar që do të shohim në vazhdim?
Në këto 3 javët e fundit kemi 2 fitore dhe 1 barazim. Kemi rikuperuar mirë me pikët. Këtë lojë që kemi bërë, duhet ta vazhdojmë që të kemi garanci për pikët. Keni filluar lojën me 4 sulmues, por Bushiç nuk po shënon.. Është lojtar altruist, është në shërbim të ekipit. Do të na duhet që Bushiç të zgjidhë situata në mënyrë individuale. Do të vazhdoni t’i besoni kësaj skeme që provuat ndaj Kukësit, pra 4-2-3-1? Brenda një ekipi duhet të ketë disa alternativa. Ndaj Kukësit na funksionoi, por s’do të thotë se do të jetë kështu gjithmonë. Gjithsesi, rëndësi ka që u shfaqëm pozitivisht me këtë skemë.
Ishte e ekzagjeruar dalja e fundit publike pas ndeshjes me Teutën sa i përket arbitrit?
Nuk kam pasur gjë me Teutën, ata nuk vodhën gjë. Fakti ishte që kishte shumë kartonë kundër nesh. Ka pasur 3-4 vendime të diskutueshme. Po të doni, ua jap edhe me video.
Po këtë herë që pas presionit që bëri klubi për arbitrin dhe më pas u ndërrua Ziri dhe u vendos Sokoli, çfarë i thatë kryesorit?
Sot (dje) arbitrit i kam thënë bravo të qoftë. Prapë kam rezerva për disa kartonë.
Veliu është rikthyer në nivele të rëndësishme, ju kënaq forma e mbrojtësit?
Lojtarëve me eksperiencë, siç është Veliu, asnjëherë nuk mund t’ia presësh hovin. Kemi nevojë për eksperiencën e Veliut. Gjithsesi, nivelit të këtyre futbollistëve duhet t’u kërkojmë më shumë nga të tjerët, sepse mbajnë barrën e skuadrës.