Idrizi: Flamurtari për titull!
Nuk e mora seriozisht në startin e sezonit, kreu është mes nesh dhe ukësit
Fitorja ka bërë që në kampin vlonjat të nisin të bëjnë llogari të tjera me objektivat dhe kampionatin. Pas ndeshjes, Idrizi ashtu si dhe në fillim të takimit, ka qenë i qeshur dhe mjaft i qetë. Paçka se Flamurtari fitoi, në deklaratën e dhënë ai ka theksuar se kjo ishte vetëm një ndeshje e mirë e Flamurtarit, ndërsa nuk ngurron që duke komplimentuar Kukësin, të listojë këto dy skuadra si pretendente që do të diskutojnë mes tyre vendin e parë dhe titullin kampion. Sakaq, Idrizi nuk ka dashur që të ndalet dhe të komentojë çështjen e arbitrave.
Erdhët i qeshur dhe po largoheni i qeshur...
Është e parë herë që fitojmë në transfertë me Kukësin. Sipas meje, Kukësi ka një superekip, një supertifozeri dhe një superpresident. Fati ishte me ne. Bëmë një ndeshje shumë të mirë dhe kaq!
Jeni i kënaqur se skuadra di të vuajë dhe të fitojë?
Para një muaji e gjysmë, unë s'e kam marrë seriozisht, por këtë vit kampionati do diskutohet mes nesh dhe Kukësit.
Patët probleme me gjyqtarin Ziri, jeni i kënaqur që u ndërrua arbitri?
Mos u merrni me arbitrin! Nuk dua të merrem fare me histori arbitrash. Tani po flasim për futboll dhe të mos bëhemi si puna e atij qaramanit.
Me këtë fitore duket se Flamurtarit i hapet oreksi, jo vetëm për Europën, por dhe për titullin. Është e vërtetë?
Unë di të them që ne dhe Kukësi do të ndajmë titullin. Të tretën nuk e di.
Jeni i kënaqur që Flamurtari zhvilloi një ndeshje të bukur?
Flamurtari ka kohë që po bën ndeshje të bukura. Kjo është e gjithë historia.