Spektakël i Flamurtarit, trondit Kukësin mes polemikave
Shënojnë Veliu dhe Alvesh, goli i kroatit Spehar s’mjafton
Zbardhet debati i Idrizit me shefin e Garave: Të mbrojta gjyqtarët nga dajaku
U ndërrua gjyqtari dy orë para ndeshjes, Cungu: Bravo vlonjatëve, luajtën edhe jashtë fushe...
Flamurtari e bën festë, trondit Kukësin në fushën asnjanëse të Kamzës dhe i afrohet vendit të tretë. Skuadra e Ilir Dajës ka marrë tri pikë të arta në transfertë, duke regjistruar fitoren e parë jashtë fushe me një ekip si Kukësi në këto gjashtë vite përballje në Kategorinë Superiore. Verilindorët kanë qenë një “mace e zezë” për kuqezinjtë, pasi këta të fundit historikisht janë thyer në stadiumin “Zeqir Ymeri”. Mirëpo, dje fusha e Kamzës nuk i solli fat Kukësit, edhe pse kishte mbështetjen e mbi 2 mijë tifozëve, si kurrë më parë këtë sezon. Franc Veliu dhe Danilo Alvesh shokuan ekipin e Armando Cungut në pjesën e parë. Kukësi reagoi mirë në të dytën, por goli i kroatit Dino Spehar nuk mjaftoi, edhe pse rastet e tjera për shënim nuk munguan. Pas 11 javëve kampionat, Flamurtari i afrohet me një pikë Kukësit të vendit të tretë, duke ndezur edhe më shumë garën për Europën. PJESA E PARË
Kukësi e nis me skemën e zakonshme tashmë 4- 4- 1- 1, ku në sulm Rexhinaldo mbështetej nga francezi Shafik, ndërsa nga krahët vepronin Ethemi dhe Melo. Flamurtari kishte vendosur të ndryshonte variantin taktik, me Ilir Dajën që rreshtoi ekipin me 4-23-1. Gjithsesi, katërshja Ribaj, Torasa, Alvesh dhe Bushiç ishte pa dyshim e tëra ofensive, ndërsa para mbrojtjes barra ishte e Useinit dhe Mustafës. Që në start duket vendosja më e mirë në fushë e miqve, të cilët shfrytëzojnë shpejtësinë e Torasës dhe bllokojnë krahët e Kukësit. Melo dhe Ethemi e kanë shumë të vështirë të shfaqen të rrezikshëm në portën e Koliçit. Flamurtari i afrohet golit me Bushiç, ndërsa reagimi i Kukësit është i dobët. Gjithsesi, loja ekuilibrohet ndjeshëm dhe për të zhbllokuar rezultatin mendon Veliu. Flamurtari gjunjëzon Kukësin nga një goditje standarde, ku tentativat radhazi të Pollozhanit dhe Veliut shpërblehen me golin e këtij të fundit. Më pas është Torasa që për pak dyfishon pas një gafe të Frashërit. Kukësi insiston për barazimin dhe Shameti bën fantazistin, duke nxjerrë të lirë Rexhinaldon brenda zonës, por mozambikasi gabon fatalisht. Ky moment vjen si një ndëshkim i dyfishtë, pasi aksioni vijon në krahun tjetër, ku vlonjatët me një kundërsulm “vrasës” dyfishojnë shifrat me Alvesh dhe shkojnë në dhomat e zhveshjes me fitoren e pastër, 0-2.
PJESA E DYTË
Cungu largon menjëherë mesfushorët Limaj dhe Ethemi për të hedhur në fushë Kalanë dhe Spehar. Është ky i fundit që rihap takimin, duke kapur në befasi mbrojtjen dhe portierin e Flamurtarit, Koliçi. Me 1-2 Kukësi merr zemër dhe për minuta të tëra kërkon të mbyllë në portë kuqezinjtë. Mirëpo, veriorët nuk e kanë qetësinë e duhur dhe madje rrezikojnë të ndëshkohen sërish nga kundërsulmet e Flamurtarit. Bushiç shpërdoron një rast të pabesueshëm për ta çuar takimin në 1-3. Në sulm del edhe kapiteni Shameti, që në limitin e takimit krijon iluzionin e barazimit pas goditjes me kokë. Edhe minutat shtesë nuk sjellin ndryshime dhe gjithçka mbyllet me fitoren 1-2 të vlonjatëve.