FSHF gafa me arbitrat, sot luhet pa... tifozë

Precedent i rrezikshëm për vazhdimësinë, ulet autoriteti i sektorit të gjykimit

Institucioni i futbollit shqiptar vendosi në fillimin e këtij sezoni të publikonte në faqen e saj zyrtare në internet emrat e arbitrave kryesorë dhe anësorë që një ditë para ndeshjeve të Kategorisë Superiore. Kjo shtensiononte disi situatën, edhe pse dihet tashmë që klubet e interesuara fort për këtë pjesë, e merrnin vesh se cilin do të kishin arbitër, duke shfrytëzuar të gjitha lidhjet e tyre në FSHF. Të enjten në mbrëmje, me t’u publikuar në faqen zyrtare treshja e arbitrave të Kukësi- Flamurtari, klubi vlonjat reagoi ashpër duke e cilësuar skandaloz caktimin e arbitrit nga Fushë-Kruja, Blerim Ziri, me argumentin se ai është i afërm i drejtorit të Kukësit, Ramadan Ndreu. Në ditën e ndeshjes ( dje) ndodhi e papritura. Shefi i caktimit të arbitrave, Sokol Jareci, njoftoi Zirin se për shkak të tensionit të krijuar nuk do të ishte ai kryesor, por Olsi Sokoli i kolegjiumit të Tiranës. Pra, vetëm asistentët nuk ndryshuan. Por, çfarë ndodhi pas këtij precedenti? Së pari, FSHF iu përul klubeve, në një kohë që fare mirë mund të kishte paralajmëruar gjyqtarin e caktuar se për shkak të këtij tensioni, të mundohej ta mbante sa më korrekt takimin, duke shuar kështu edhe paragjykimet e vlonjatëve. Ky precedent është shumë i rrezikshëm, sepse në vazhdimësi çfarë mund të ndodhë nëse ngrenë zërin edhe klube të tjera, duke kundërshtuar arbitrat që u caktohen. Ajo që ndodhi uli totalisht autoritetin jo vetëm të arbitrit që u zëvendësua, por mbi të gjitha të sektorit që merret me “bluzat e zeza”. Gjyqtarët do të vazhdojnë të paragjykohen, por ama FSHF nuk mund të bëjë lojëra, duke iu ardhur klubeve pas avazit dhe krijuar precedentë të tillë, që mund ta rrezikojnë jo pak garën. Dje në ndeshjen e luajtur në Kamzë mungoi kartoni i kuq, por gjithsesi ky ndëshkim meriton t’i jepet sektorit të gjykimit, që në vend të rrisë besueshmërinë, bëhet qesharak në ditët e ndeshjeve, duke u kthyer pas në kohë, kur ndërhyrjet e të “mëdhenjve” bënin lëmsh listat.