Inter hyjnor me Xhenoan, Spaletin e shpallin “shenjt”
Galjardini-Politano sigurojnë 3 pikët, në fund shënojnë edhe Zh.Mario e Naingolan
Fitorja e shtatë radhazi, një përgjigje për Napolit, një “mesazh” për Juventusin kryesues. Interi regjistron suksesin e radhës (9 në 10 sfidat e fundit mes kampionatit dhe Champions-it), këtë herë me shumë thjeshtësi. Me një skuadër të revolucionuar, përpara së martës, kur do kërkohet “hakmarrja” ndaj Barcelonës, zikaltrit “thyejnë” Xhenoan me një rezultat të thellë 5-0. Juriç, pasi humbi 10 të mërkurën në “San Siro” kundër Milanit në shtesë (91’), këtë herë duron shumë pak. Vendimtarë dy golat e parë të shpejtë interistë (14’ dhe 16’) në pjesën e parë: shënuan Galjardini e Politano. Në shtesë, trisi i mesfushorit italian dhe Zhoao Mario e Naingolan përmbushin “manita”-n.
NDRYSHIME — Interi, përballë më shumë se 67 mijë spektatorëve, luan bukur, por edhe sepse Xhenoa bën shumë pak dhe nuk jep kurrë përshtypjen se mund t’i krijojë rreziqe Handanoviçit. Spaleti lë në stol Ikardin, Vesinon e Azamoahn, i jep sërish besim Zhoao Marios dhe rikthen Galjardinin, Dalbertin e Lautaron nga 1’. Juriç, që nuk gjen fitoren tashmë prej 5 ndeshjesh, në krahun tjetër, e nis pa bomberin Piontek dhe në sulm i beson dyshes Pandev-Kuame. Zgjedhjet i japin të drejtë trajnerit zikaltër, që siguron shumë shpejt fitoren.
VENDIMTARË — Rasti i parë interist regjistrohet që në 2’: krosim i Politanos, Lautaro dy hapa larg portës godet keq (me kofshë). Kuqeblutë “zgjohen” në të 11- ën me Lazoviç, që driblon në zonë D’Ambrozion dhe tenton kuadratin, por nuk e gjen. Ndeshja zhbllokohet në të 14ën: Biraski i ndërlikon punën vetes pas aksionit të Lautaros, mesfusha zikaltër rikuperon topin dhe niset drejt zonës së Xhenoas. Devijimi pas goditjes së argjentinasit favorizon Zhoao Marion, portugezi thuajse gabimisht shërben Galjardinin, i cili nuk gabon. Pozicioni i mesfushorit është i dyshimtë, por edhe VAR- i pas disa minutash miraton avantazhin. Nuk del as koha për të festuar sepse pas një pasimi “magjik” të Handanoviçit, Interi dyfishon rezultatin: sërish Zhoao Mario në versionin asistmen, këtë herë Politano tregohet i zoti duke i rrëmbyer kohën Lazoviçit. Pas driblimit, i vetëm përballë portës, mposht portierin Radu.
MBYLLEN LLOGARITË — Në pjesën e dytë nuk ndryshon thuajse asgjë. Sepse pas 5’ vjen goli i tretë, sërish me Galjardinin, i cili firmos dopietën e parë në Serinë A (në ndeshjen numër 69). Te
Xhenoa vjen edhe momenti për kryegolashënuesin Piontek, Pandev rikthehet në stol mes një shiu duartrokitjesh: “San Siro” nuk ka harruar një nga heronjtë e tripletës. Polaku shfaqet menjëherë i rrezikshëm me një goditje me kokë, e pritur nga Handanoviç,
por në “morsën” De Vraj- Shkrinjar nuk gjen shumë hapësira. Në minutat shtesë vijnë edhe pokeri i Zhoao Marios dhe “manita” e Naingolanit (goli i parë për belgun në “Meazza”). Interi tani fluturon dhe, me qetësi, mund të mendojë për Barcelonën.