Partizani cinik, vendos “komandant” Telushi ndaj Kamzës
"Demat" shpërdorojnë në të parën, vuajnë në të dytën
Partizani i trajnerit Skënder Gega vijon të mbetet cinik në fitoret e tij, ku i mjafton edhe një gol i vetëm për të marrë trepikëshin. Për të fituar beteja duhen komandantë, që jo vetëm "shkatërrojnë" kundërshtari, por shënojnë edhe vetë. Mesfushori Bruno Telushi po bën liderin te Partizani dhe dje ishte ai që vulosi fitoren ndaj Kamzës, madje pasi shënoi bëri edhe një nderim ushtarak. Goli i vlonjatit bëri që Partizanit t'i kthehet buzëqeshja pas humbjes me Skënderbeun. Por, në ndeshjen e djeshme faktorë u bënë edhe shtyllat, ku dy herë në pjesën e parë ishin aleatë për Kamzën, duke i mohuar golin Malës dhe Ibrahimit. Ndërsa në minutën e 77-të gjuajtja e Frashërit ndalet nga shtylla pingule, duke bërë që goli i Telushit në minutën e 47-të të mbetet i vetmi në derbi. Takimi i djeshëm ishte pak a shumë një fotokopje e duelit të fazës së parë, ku të kuqtë vuajnë, por fitojnë nga goli i mesfushorit vlonjat, ndërsa kamzalinjtë në të dyja ndeshjet nuk e kanë merituar humbjen. Me këtë sukses, Partizani ruan distancën - 1 pikë nga Skënderbeu.
PJESA E PARË- Të dyja ekipet vinin me ndryshme në formacion, ku pa dyshim më të shumtat ishin te Kamza, pasi kishte të dëmtuar dhe të pezulluar. Kote dhe Çinari ishin risia e formacionit të djeshëm të trajnerit Gega, që i hodhi në fushë nga minuta e parë, së bashku me Trashin që u pezullua nga klubi ndaj korçarëve. Kote zëvendësoi Hilën e pezulluar, por nuk arriti të përshtatej si duhej me Telushin. Ndërsa trajneri Duro, pa kapitenin Plaku me probleme shëndetësore, Arrabal të pezulluar nga kartonët, por edhe me Teqjen jo të rikuperuar, ishte i detyruar të sajohej. Te Partizani nuk kishin rrugë tjetër, veç fitores dhe me këtë mision e nisin direkt takimin në sulm, ku që në minutën e parë krijojnë shansin e parë. Por si ndeshje pa tifozë, lojtarët e kanë pak të vështirë të motivohen në fushë. Në minutën e pestë Beqiri ishte pranë autogolit, por shpëton portieri Avdyli. Në minutën e 13- të, trajneri Duro është i detyruar të bëjë zëvendësim. Orelesi i dëmtuar zëvendësohet nga Bonani, që pozicionohet në qendër të mbrojtjes. Të kuqtë janë më kërkues në pjesën e parë, por të besuarit e trajnerit Gega nuk e gjejnë dot rrugën e rrjetës. Në minutën e 34-t shënojnë me Bardhin, por anulohet
për pozicion jashtë loje të Çinarit. Një minutë më pas gjuajtja e Malës ndalet nga traversa, por gjyqtari edhe mund të akordonte penallti, pasi Idrizaj ndërhyri gabimisht ndaj Malës. Në minutën e 41-të Beqiri i dëmtuar ia lë vendin Peçit. Në minutën e dytë shtesë, gjuajtja
e Ibrahimit ndalet nga shtylla pingule. Ndërsa në aksionin pasues, portieri Alban Hoxha tregohet shpëtimtar, pasi i mohon golin Roloviçit. 0-0 mbyllet pjesa e parë.
PJESA E DYTË- Fraksioni i dytë nis mbarë për "demat", pasi që në minutën e dytë e gjejnë golin me Telushin. Pas golit të kuqtë sikur tërhiqen në administrim, por rrezikojnë shumë, pasi kamzalinjtë kanë rastet e tyre, ku spikat goditja e shtyllës nga Frashëri në minutën e 77- të. Partizani vuan shumë në pjesën e dytë, pasi rastet ishin më të shumta
për miqtë, por goli i Telushit mbeti i vetëm për shumë arsye. Nuk munguan edhe vendimet e kontestueshme nga gjyqtari Koçi. Zëvendësimet e kryera në pjesën e dytë nuk arritën të bëjnë diferencën, vetëm sa sollën ndryshim skeme dhe rreshtimi te Partizani.