Demi batuta me Qarrin, Kamza i nxjerr “dufin” arbitrit në fund

Në një stadium të boshatisur nga tifozët, çdo fjalë e lojtarëve, stafit teknik, por edhe pjesëtarëve që ndodheshin në tribunën VIP ishin më se të dëgjueshme. Referuar kësaj situate, trajnerët u treguan më të kujdesshëm në fjalor, pasi në përgjithësi mjaftoheshin duke bërë "apelin" e lojtarëve që udhëzonin apo u tërhiqnin vëmendjen. Udhëzimet e trajnerëve ishin thuajse normale, të tipit: ec; vazhdo përpara; spostohu; afrohu; luajmë; qarkullo topin; pasoje; mbuloje; s'ka gjë; mos etj., etj. të aspektit teknik.

- Gjatë kohës që ekipet bënin nxehmje, presidenti i Kamzës ndodhej në pistën e stadiumit ku u takua miqësisht me të gjithë stafin dhe drejtuesit e Partizanit. Nuk munguan takimet dhe përqafimet e presidentit të Kamzës me trajnerin Gega, drejtorin e Akademisë Genc Tomori dhe drejtorin e përgjithshëm, Olsi Rama. Gjatë kohës që presidenti i Partizanit hyri në stadium dhe po pozicionohej në tribunën VIP, presidenti i Kamzës Naim Qarri ndodhej në pistë nën shoqërinë e Genc Tomorit. Në këtë moment Demi i drejtohet Qarrit: "O boso, mos u lodh shumë". Më pas presidenti i të kuqve vijon batutën me Genc Tomorin: "O drejtor, qëndro ftohtë ndaj këtyre të Kamzës!" - Si ndeshje pa tifozë të dyja ekipet hynë në fushë në atmosferë të vakët, pa asnjë duartrokitje. Pas rreshtimit në vijë të drejtë, ku më pas do të përshëndesnin njëri-tjetrin, i vetmi lojtar që vijoi ritin duke u kthyer nga tribuna për karshi për të përshëndetur ishte portieri i Kamzës, Ilir Avdyli. Ndonëse nuk kishte tifozë, përshëndetja e tij instiktive nuk shkoi dëm, pasi aty ndodheshin katër fëmijë që mblidhnin topa.

- Pas përshëndetjes zyrtare të ekipeve, dëgjohet thirrja e delegatit të ndeshjes Alban Tafaj ndaj arbitrave: "Shpejt se jemi vonë". Ndeshja nisi me 1 minutë vonesë nga orari zyrtar, 17:00. - Minuta 4: Loja është ndërprerë për një faull të shkaktuar në zonën e Kamzës. Frashëri afrohet afër pankinës së kuqe dhe trajneri Gega i shërben ujë mbrojtësit të Kamzës.

- Minuta 20: Trajneri Skënder Gega urdhëron Asanin që të ndërrojë krahun me Çinarin. - Minuta 26. Në një moment pauze në fushë Egzon Belica u drejtohet shokëve të tij të ekipit: "Shpejt çuna, duhet të bëjmë gol".

-Minuta 32: Trashi proteston te gjyqtari i katërt për një faull të

padhënë në favor të Partizanit: "Eeee, është faull". Arbitri ia mohon dhe Trashi vijon: "Me çfarë syri e pe, pse kaq i papërgjegjshëm".

- Në përfundim të pjesës së parë, kur ekipet po u drejtoheshin dhomave të zhveshjes, sulmuesi i Kamzës, Ognjen Roloviç, afrohet dhe komplimenton portierin Alban Hoxha për pritjen që i bëri gjuajtjes së sulmuesit në minutën e 45-të. -Minuta 48: Pas shënimit të golit nga Telushi, kur Kamza po bëhej gati të vinte topin në lojë, nga qendra dëgjohet thirrja e Lorenc Trashit ndaj shokëve të tij të ekipit: "Mos ulni ritmin, shkojmë përpara!"

- Minuta 51: Labinot Ibrahimi, pas një inkursioni drejt portës së Kamzës, gjuan fort, por topi përfundon jashtë. Presidenti Demi nga tribuna mbështet mbrojtësin: "Bravo Labi! Fort!" -Minuta 55: Trajneri Gega, pasi e thirri disa herë, i bërtet fort Bardhit që të dëgjojë: "Bardhi, shpejt këtu se e ke bosh zonën!"

- Minuta 55. Portieri Hoxha e shikon veten në vështirësi, pasi Zisi gjen një hapësirë mes Ibrahimit dhe Asanit, por fatmirësisht goditja përfundoi jashtë. Në këtë rast kapiteni i ngre zërin Asanit që e kishte më afër: "Ooo, jeni dy veta, çfarë bëni!" Por, me sa duket Asani la të kuptojë se ia la mbulimin Ibrahimit. "Foli, pra", iu drejtua më tej portieri sulmuesit.

- Tabelat elektronike ishin me probleme. Tabela e Kamzës nuk ishte funksionale dhe iu desh të përdorte tabelën e Partizanit. Por, edhe ajo kishte problemet e saj. Te ndërrimi i Mensah me Çinarin duhej që numri 90 i sulmuesit ganez të ishte me jeshile dhe shtata e shkodranit me të kuqe. Por, numrat në tabelë ishin me ngjyra të ndryshme, pasi te pjesa e jeshiles numri 90 nuk shtypej. -Kamzalinjtë ishin të irrituar në fund me gjykimin për disa faulle të padhënë për ata, apo mosndëshkim të kundërshtarit. Nuk munguan edhe ofendimet ndaj gjyqtarit Andi Koçi nga pjesëtarë të stafit të Kamzës.