"Kursyem energji, Krasniqi s'po i bën si duhet detyrat"

Orges Shehi mjaftohet me trepikëshin. Edhe pse një fitore e vuajtur, trajneri i Skënderbeut nuk hezitoi që të komplimentojë të tijtë. Në intervistën e dhënë për emisionin "Gol pas Goli" të moderatores Vilma Masha, ai ka deklaruar se skuadra u mundua që të kursente energji, ndërsa për Krasniqin evidentoi se nuk po i kryen siç duhet detyrat. Ishte paralajmëruar rrotacion, por në fakt vetëm dy titullarë kursyet. Bëtë këtë zgjedhje, pasi e prisnit të vështirë? Ishte një ndeshje e vështirë dhe ne vinim mbas një fitoreje me një ekip rival. Këto ndeshje, të cilat në letër konsiderohen të lehta, bëhen të vështira. Sot (dje) lamë pushim dy lojtarë dhe në fakt jam i kënaqur me ata që ishin në fushë.

Goli i dytë nuk erdhi kurrë, jeni të pakënaqur që nuk e mbyllët më herët ndeshjen? Më mirë do ishte ta kishim mbyllur ndeshjen. Kemi pasur dy raste, të cilat nuk i realizuam. I tillë është futbolli ndonjëherë edhe duhet të vuash. Menduam që dy lojtarë të formacionit bazë, që kanë luajtur thuajse të gjitha ndeshjet, t'i linim pushim. Gjithashtu, duke parë edhe formën e mirë të Sambou dhe Guedj, i cili ndërton më shumë, arritëm të fusnim këta dy të fundit. Gjithsesi, energjitë e ruajtura për ndeshjet e tjera nuk të bëjnë keq. A keni menduar ndonjëherë t'i fusni bashkë Krasniqin dhe Oto Xhon? Në këtë fazë janë të rëndësishme pikët. Ne kemi shumë lojtarë që luajnë në krahë dhe kjo skemë 4-3-3 është më e përshtatshme për ne. Pyka që luan para shpenzon shumë energji dhe në fakt ka rezultuar efikas zëvendësimi. Në të ardhmen nuk i dihet, në ndeshje të caktuara mund të futemi edhe me dy sulmues. Gjithmonë Muzaka do t'ia zgjidhë ndeshjet Skënderbeut? Na bëhet qejfi që Muzaka i zgjidh ndeshjet. Këto dy takimet e fundit i zgjidhi Muzaka, disa të tjera i ka zgjidhur Bregu, Krasniqi apo edhe Oto Xhon. Në fakt, më pëlqen kjo shpërndarje. Shpresoj që ndeshjet e tjera t'i zgjidhin lojtarët e tjerë dhe jo vetëm Muzaka. Krasniqi i vetmuar, duhet të kishte më shumë ndihmë? Skuadra mund t'i rrijë më afër Krasniqit, por disa lëvizje duhet t'i kërkojë vetë. Nuk po i bën ato lëvizje që i kam kërkuar. Po i bëri ato, sigurisht që do të jetë më afër golit.