Muzaka: Sndalemi, ja sekreti ynë
"Pa asnjë oshilacion, Skënderbeu ka treguar garanci. Goli# Vlen më shumë fitorja"
Skënderbeu mund Kastriotin dhe golin e shënon Gjergji. Një lojë fjalësh dhe kombinimesh të identitetit të Heroit tonë Kombëtar, por realisht ishte mesfushori Muzaka që u bë hero për të dytën ndeshje radhazi. Pas Partizanit, mesfushori ndëshkon edhe Kastriotin dhe korçarët marrin gjashtë pikë nga këmbët e tij. Për "Panorama Sport", autori i golit të fitores është i bindur se triumfi i ekipit shërben më shumë sesa goli personal.
GJERGJ KASTRIOT SKËNDERBEU - I pyetur në lidhje me këtë kombinim, që ndeshjen mes Kastriotit dhe Skënderbeut e vendosi Gjergji, Muzaka përgjigjet.
"Përtej kësaj, është një fitore e rëndësishme për ne dhe me mjaft vlera. Jam më shumë i kënaqur që arritëm të vijonim serinë e rezultateve pozitive sesa për golin personal. Ky ekip ka karakter dhe grintë", shprehet fillimisht Muzaka.
ÇELËSI I SUKSESIT - Golat rregullisht dhe rendimenti i lartë kanë patjetër një shpjegim. Mirëpo, për Muzakën kjo është thjesht vijimësi e rutinës profesionale që ka bërë gjithmonë, duke u përgatitur për të dhënë më të mirën. "Unë nuk di, gjithmonë kam qenë kështu, kam dhënë maksimumin tim dhe jam stërvitur gjithmonë kështu për të dhënë atë që më kërkohet. Nëse diçka nuk ka shkuar mirë, nuk ka pasur të bëjë me mua, por me faktorë të jashtëm", ka vijuar futbollisti i korçarëve.
ECURIA - Muzaka shënoi të katërtin gol në kampionat, ndërkohë që Skënderbeu vijon të ruajë ecurinë e rezultateve pozitive. Pas Partizanit, radha ishte e Kastriotit, duke treguar që kjo skuadër mund të shkojë larg. Këtë e konfirmon edhe vetë siguria e Muzakës, i cili nuk e fsheh bezdinë kur korçarët nënvlerësohen për çfarë mund të arrijnë deri në fund. "Është e disata herë që më bëhet kjo pyetje dhe mund të them se ka filluar të bëhet paksa e bezdisur. Ne jemi këta, japim gjithmonë më të mirën dhe nuk shoh pse duhet të vihet në diskutim. Nuk jemi një ekip që kemi pasur oshilacione nga një ndeshje në tjetrën, por kemi treguar garanci dhe qëndrueshmëri", ka deklaruar Gjergji Muzaka.