Ibra më shumë se hipotezë, Milani mesazhe suedezit
Transferimi i Zlatan Ibrahimoviçit te Milani vazhdon të përflitet çdo ditë e më shumë. Sipas “Sportmediaset”, kuqezinjtë planifikojnë një transferim në janar të sulmuesit, duke i ofruar një marrëveshje fillestare që do të përfundonte në fund të sezonit aktual. Nëse Milani, më pas arrin të renditet mes katër të parave në Serinë A, do të vinte automatikisht një rinovim marrëveshjeje edhe për një tjetër vit. Patrik Kutrone dhe Gonzalo Higuain janë të vetmit qendërsulmues në dispozicion të Rino Gatuzos dhe te Milani askush nuk dëshiron të shohë një situatë të ngjashme me atë të disa javëve më parë, kur me dy bomberat e dëmtuar, praktikisht në dispozicion të trajnerit, nuk kishte asnjë pykë tjetër. SFIDA – Aventura e Ibrës me Los Anxhelos Galaksi duket se ka arritur në stacionin e fundit, pasi ekipi nuk mundi të kualifikohej në fazën “play-off” të kampionatit amerikan. Për lojtarin, por sidomos bashkëshorten, Helen, Milano do të ishte një destinacion i pëlqyer. Mino Raiola ndërkohë ka nisur të hapë spiralet e para të këtij operacioni. Duke shfrytëzuar bisedimet me kuqezinjtë për rinovimin e Xhakomo Bonaventurës, menaxheri ka folur me drejtuesit e “Djallit” për një rikthim të mundshëm të suedezit te Milani. Megjithëse nuk përmenden shifra, “Djalli” mund të përdorë drejtorin Leonardo për të afruar 37vjeçarin, duke qenë se ka qenë pikërisht braziliani që ka ndërmjetësuar në transferimin e Ibrës te PSG-ja gjashtë vite më parë. Marrëdhënia mes të dyve duket e shkëlqyer, teksa afrimi i gjigantit nga Malmo e ka marrë pëlqimin e të gjithë ambientit kuqezi, madje përfliten edhe shkëmbimi i disa mesazheve telefonike mes palëve.
KOSTO – Duke parë 40 milionë eurot e shpenzuara për Lukas Paketën, Milani nuk mund t’i lejojë vetes shpenzime të mëdha. Aktualisht, Ibra paguhet 1.5 milionë euro, por paga e tij prek 4 milionët sezonale falë sponsorëve. Në respekt të “Fair Play Financiar”, Leonardo do të mundohet që kontraktimin e Ibrës ta argumentojë si një
afrim pa shpenzime, teksa në fokus do të jetë pagesa e sulmuesit, që siç thamë, si fillim do të jetë vetëm për periudhën janar-qershor. Deri në verë, UEFA do të ketë dhënë edhe dënimin për Milanin, ndërkohë që gjashtë muajt do të shfrytëzohen për të monitoruar paktin e Ibrahimoviçit në ekip, rezultatet dhe normalisht arkat e klubit.