Rashford përmbys në fund, Murinjo: Duhet të humbnim 6-2
Trajneri: Unë jam trajneri më me fat i Premier Ligës
Tri pikë me shumë vuajtje. Mançester Junajtid fiton me përmbysje në Bornmëth dhe arrin në kuotën e 20 pikëve skuadrën e Edi Haut. Në mungesë të Lukakut është Marsial, me golin e pestë në 4 ndeshjet e fundit me "djajtë e kuq". Sulmuesi francez firmosi golin e barazimit në 35', pas një nisje me marsh të pestë të vendësve që kaluan në avantazh në 11' me Uillsonin pas krosimit të Stanislas. Tridhjetë minutat e para skuadra e Edi Haut është me të vërtetë spektakolare. Por, Junajtid transformohet në pjesën e dytë, ku luhet vetëm me një portë. Begoviç shpëton ndaj Shout, pastaj Mou vendos të nisë xhiron e ndërrimeve dhe me aktivizimin e Herrera-Rashford, miqtë ndërrojnë marsh. Një top i Herreras kalon fare pranë shtyllës, pastaj në 64' aksioni i denjë për film: Jang godet traversën me një goditje dënimi, Rashford bllokohet nga Ake dhe në prekjen pasardhëse të Pogbasë, Bruks spastron mbi vijën fatale. Junajtid këmbëngul: Herrera edhe njëherë tjetër është një hap larg 2- 1. Shpërthimi i Bruks gjen De Gean gati nga ana tjetër. Por, Begoviç dorëzohet në 92', përballë Rashfordit, në një aksion që gatuhet nga këmbët e Pogbasë. Tani Murinjon e pret një javë zjarri: fillimisht transferta në Champions kundër Juves të mërkurën dhe të dielën e 11 nëntorit derbi kundër
Mançester Sitit në "Etihad".
MURINJO - Portugezi pranoi pas ndeshjes se skuadra e tij është me të vërtetë me fat, sepse mund të ishte duke humbur 6-2 në pjesën e parë, ku skuadra vendëse i vuri në vështirësi të mëdha dhe krijoi raste pafund: "U thashë lojtarëve në
pjesën e parë se jam trajneri më me fat në Premier Ligë. Në pushim duhet të kishim qenë pesë apo 6-2 për ata. Ishim të tmerrshëm në mbrojtje. Nuk ushtruam presing si skuadër. Njerëzit që panë këtë ndeshje, nuk do ta besojnë se sa shumë kemi punuar këtë
javë. Pjesa e parë ishte e tmerrshme. Pjesa e dytë? Ishte shumë më e mirë. Krijuam shumë raste dhe merituam të shënonim përpara minutës së 92-të. Në pjesën e parë u thashë lojtarëve se ishte e pamundur që të luanim më keq se aq, kështu që në të dytën do
të ishim pa dyshim më mirë". I pyetur për arsyet e një nisjeje kaq të dobët, 55-vjeçari tha: "Nuk e di përse e nisëm aq ngadalë. Trajnerët më thanë se bëmë nxehmjen më të mirë të sezonit. Mendoj se disa gabime krijojnë paqëndrueshmëri. E adhuroj këngën 'sulmo, sulmo, sulmo', por duhet të kesh ekuilibër kur humbet topin. Jam i kënaqur me atë që solli Ander Herrera në fushë. Mendova se kishim nevojë për të në fushë, që të na jepte më shumë ekuilibër dhe ta rikuperonim topin më shpejt. Jam i kënaqur nga ky ndërrim. Na përmirësoi shumë".