Niko Kovaç: I falëm një pikë kundërshtarit

Trajneri i Bajernit, Niko Kovaç, ka qenë shumë i zhgënjyer pas barazimit në shtëpi ndaj Fraiburgut. Kroati nuk e ka kapërdirë siç duhet golin në fundin e ndeshjes të shënuar nga skuadra mike. "E nisëm shumë mirë ndeshjen, duke pasur një zotërim të mirë të topit dhe loja ishte gjithmonë nën kontrollin tonë. U munduam të krijonim aksionet duke u nisur nga krahët,por hasëm vështirësi në momentet kur kundërshtari u mbrojt me shumë lojtarë në gjysmëfushën e tij", u shpreh Kovaç. "Pastaj tentuam të sulmonim nga qendra, por edhe aty nuk ishte e lehtë. Duhet të kishim kaluar më parë në avantazh dhe me rastin e Levandovskit do të kishte qenë shumë herë më e lehtë për ne. Më pas arritëm të kalonim në avantazh me meritë, por kundërshtari mori zemër dhe filloi të na sulmonte. Këtë nuk duhet t'ia kishim lejuar vetes. Jemi Bajerni dhe duhet të kishim shënuar golin e dytë. U kthyem prapa dhe i dhuruam kundërshtarit një pikë. Ata na ndëshkuan në momentin e parë që iu afruan portës së Nojerit. Jam shumë i zhgënjyer pasi në tabelën e klasifikimit na mungojnë 4 pikë. Kjo ndeshje më ngjau njësoj si ajo ndaj Augsburgut, ku humbëm shumë raste për shënim dhe në fund nuk shkuam më shumë se një barazim 1-1. Por kështu e ka futbolli, duhet të shohim përpara dhe të mundohemi të korrigjojmë gabimet që bëmë në këtë takim", përfundoi Kovaç pas ndeshjes. Ndeshja e radhës për Bajernin do të jetë ajo ndaj Borusias së Dortmundit në "Signal Iduna Park" javën e ardhshme. Trajneri Kovaç do të ketë një detyrë të vështirë përballë skuadrës së Favresë, e cila renditet në vendin e parë më katër pikë më shumë se bavarezët.