Nga penalltia te zëvendësimet, ja ndryshimet
Bota e futbollit mund të pësojë ndryshime të mëdha në rregullore. Për momentin ndodhen në zyrën e Bordit të Shoqatës Ndërkombëtare të Futbollit (IFAB), por mund të miratohen në mbledhjen e 6 nëntorit në Londër. Janë duke u vëzhguar disa ndryshime që lidhen me goditjen e penalltive, faullet e prekjes së topit me dorë dhe zëvendësimet. Por, përveç këtyre rregullave, po mendohet që të modifikohen edhe disa ndëshkime. Objektivi kryesor i kësaj mbledhjeje është që të mos lërë hapësira për interpretim dhe pikëpyetje në aplikimin e rregullores. PENALLTIA- Modifikimi i parë që do të merret në konsideratë ka të bëjë me goditjet e penalltive. 11-metërshi mund të shndërrohet në një goditje të vetme, çka do të thotë ndërprerjen e aksionit, pasi topi ndalet nga portieri, shtylla ose traversa. Kjo do të thotë se nëse goditësi i penalltisë nuk shënon direkt, atëherë nuk ka më shanse dhe mundësi që ta godasë topin sërish as ai, as shokët e tij. Ideja është që të zhduket përfundimisht futja e lojtarëve të tjerë në zonë kur goditet një penallti. Po mendohet që e njëjta situatë mund të përsëritet edhe në goditjet e penalltive që shërbejnë për të përcaktuar fituesin e një ndeshjeje në shtesë. PREKJA ME DORË- Një tjetër temë diskutimi do të jetë në lidhje me prekjen e topit me dorë, e cila shpeshherë konsiderohet nga arbitrat si e vullnetshme apo e pavullnetshme. Për ta lexuar vetëm në një mënyrë rregullin. Komiteti kërkon të qartësojë një herë e përgjithmonë prekjet me vullnet të plotë. Rasti që do të merret në diskutim është ai i ndeshjes Gremio-River Plejt, me një penallti, e cila u akordua pas prekjes së topit me dorë nga Bresan pas goditjes së Ignasio Skoko, i cili kishte dorën e hapur. ZËVENDËSIMET- Për të shmangur humbjen e kohës dhe nervozizmin e kundërshtarëve, mund të ketë ndërhyrje edhe në strategjinë për menaxhimin e zëvendësimeve, ose shpejtësinë e kryerjes së tyre gjatë minutave të shtesës. Lojtarët që zëvendësohen duhet të dalin nga fusha në pikën më të afërt me të (qoftë anësore apo fundore), duke anuluar ecjen apo vrapin me hapa të lehtë. Në anën tjetër është edhe ideja për të ndalur kronometrin në momentin kur bëhen zëvendësimet, ashtu siç ndalet koha në basketboll apo futbollin e sallës. Kjo gjë do të zhdukte edhe shtesën prej 30 sekondash që shtojnë arbitrat. KSAVI- Në logjikën e këtyre ndryshimeve ka folur edhe legjenda e Barcelonës, Ksavi, i cili thotë se futbolli mund të luhet edhe me 10 lojtarë dhe kështu do të bëhej më argëtues.