Disiplina Përjashtohen "Fanatics", gjobë Kukësit
Ditën e djeshme, në faqen zyrtare të Federatës Shqiptare të Futbollit janë publikuar edhe vendimet e Komisionit të Disiplinës. Ndërkohë që bien në sy pak shkelës për javën që lamë pas, pasi janë prekur vetëm tre klube të Superiores dhe vetëm një i Kategorisë së Parë, evidentohet mosndëshkimi kolektiv. Ndryshe nga herët e tjera, Disiplina ka vendosur të ndëshkojë grupin e ultrasve të skuadrës së Tiranës, "Tirona Fanatics" me dy ndeshje mospjesëmarrje, ndërsa ka gjobitur edhe skuadrën e Kukësit me gjobë prej 500 mijë lekësh (të vjetër për sjellje të gabuar të spektatorëve).
FK "Kukësi", për sjellje të gabuar të tifozërisë së tij, duke hedhur sende brenda rrethimit të fushës, në bazë të Nenit 66/1 të KDS, dënohet me gjobë në masën 50.000 (pesëdhjetëmijë) Lek.
Grupimi i tifozëve të KF Tirana, "Tirona Fanatics" për sjellje të gabuar, duke paraqitur parulla ofenduese, në bazë të nenit 21 dhe 66/3 të KDS përjashtohet nga pjesëmarrja për 2 ( dy) ndeshje të njëpasnjëshme në sektorët përkatës të stadiumeve; Urdhërohet KF Tirana të ekzekutojë vendimin, duke mbyllur sektorët përkatës.
Zyrtari i FK "Kamza", Andi Matraxhiu, për sjelle të gabuar ndaj zyrtareve të ndeshjes, në bazë të Nenit 49/ 2/ a të KDS, dënohet 10 (dhjetë) ndeshje pezullim nga aktiviteti. Në bazë të Nenit 21 të KDS, zyrtarit i ndalohet hyrja në dhomat e zhveshjes, qëndrimi në stolin e rezervave dhe territori përreth fushës së lojës.