Sherr në Tirana-Kukësi, tifozët sulmojnë lojtarët
Mbyllet në barazim, Rexhinaldo humb penallti dhe shpërthen në lot
Spektakël pa fitues në “Selman Stërmasi”, në një ndeshje që i pati të gjitha përveç golave. Penallti e humbur, shtylla, karton i kuq dhe në fund invadim fushe nga tifozët. Tirana dhe Kukësi ndanë nga një pikë dhe ndoshta rezultati 0- 0 nuk kënaqi asnjë nga skuadrat. Bardheblutë luajtën më mirë, krijuan volum të madh loje dhe raste, por ashtu si në ndeshjet e kaluara, treguan se e kanë shumë të vështirë për të dërguar topin në rrjetë. Krahët e sulmit me Grecën dhe Kobinah, të dy në një ditë të mirë, nuk mjaftuan për të nxjerrë nga kriza bardheblutë. Sulmuesi kryesor i Tiranës, Junus Sentamu, ishte gjithnjë larg portës, ndërsa te Kukësi shpresuan te zhbllokimi i Rexhinaldos, por më kot. Golashënuesi i nënkampionëve kishte shansin më të mirë, por nga pika e bardhë shpërdoroi, kjo edhe për meritë të portierit Abibi, i cili zëvendësonte Likën. “Veterani” e nisi nga stoli pas formës jo të mirë në ndeshjet e fundit, ndërsa te Kukësi mungesa e madhe ishte kapiteni Ylli Shameti.
PJESA E PARË - Tirana është më agresive që në start, duke treguar një freski fizike për t’u admiruar përballë një Kukësi që zgjedh të presë kundërshtarin dhe më pas ta godasë përmes kundërsulmeve. Skuadra e Memës kërkon të shfrytëzojë shpejtësinë e Grecës dhe Kobinah, teksa mbrojtësit e krahut të Kukësit, Maliqi dhe Zguro, vuajnë pa fund. Sinjalin e parë e jep pikërisht Kobinah, por Frashëri reagon mirë. Janë minuta të mira për Tiranën, që krijon presion të vazhdueshëm, duke i marrë mesfushën Kukësit, aty ku Dzaria dhe Shkodra e kanë thuajse të pamundur për të mbajtur topin. Hoxhallari, tashmë i kthyer në një qendërmbrojtës pas ardhjes së trajnerit Mema, i befason të gjithë me një “predhë” me të majtën nga rreth 40 metra, por topi përplaset në traversë dhe fati është me Kukësin. Pas 25 minutave loja ekuilibrohet ndjeshëm dhe Kukësi kërkon të qarkullojë topin, duke shfrytëzuar fantazistin Shafik. Ky i fundit bëhet protagonist i një asisti mjeshtër te Rexhinaldo, që fiton një penallti pas ndërhyrjes së gabuar të portierit Abibi. Megjithatë, sulmuesi e shpërdoron dhe Tirana “fërkon duart”.
PJESA E DYTË - Pas
pushimit trajnerët nuk mendojnë për ndryshime në formacion. Loja është thuajse fotokopje e pjesës së parë, edhe pse Kukësi kërkon të bëhet më ngacmues me goditjet standarde apo tentativat nga jashtë zone. Doka ka shansin e artë për të shënuar pas një
inkursioni fantastik nga e djathta, por goditja e mbrojtësit s’ka shënjestrën e duhur. Cungu largon Rexhinaldon, që është në hije, ndërsa Mema forcon mesfushën me Mavejen. Gjithçka ekuilibrohet, por lodhjen e ndien më shumë Kukësi. Megjithatë,
lojtarët me eksperiencë në mbrojtje të nënkampionëve, veçanërisht Cuculi, i mbajnë larg portës sulmuesit bardheblu. Në fund veriorët mbeten me 10 lojtarë pas daljes me të kuq të Melos, ndërsa Abibi i mohon një gol të sigurt kroatit Spehar.