Luftëtari, trajneri ka dilema në mbrojtje
Gentian Mezani zgjedh heshtjen para sfidës me ish-skuadrën, Kalluci: Sdalin pa pikë
Për Luftëtarin e Gentian Mezanit, një tjetër hap i gabuar në ndeshjen e sotme me Flamurtarin do të thotë komprometim i objektivit qëndrim në Superiore. E si për të "fashitur" humbjen e së shtunës me Laçin në shtëpi, bluzinjtë e Mezanit mbyllën përgatitjet për sfidën e sotme. HESHTJE- Me seancën e mesditës, që startoi në orën 14:00, trajneri Gentian Mezani la të kuptohet se 11-shi do të jetë po ai i sfidës me Laçin. Për të mbajtur në tonus fut- bollistët e për më shumë me këmbë në tokë, stafi teknik i Luftëtarit ka preferuar heshtjen për shtyp. FORMACIONI - Mes shtyllave të kuadratit bluzi pritet Ruci. Në repartin e mbrojtjes pritet që të rreshtohen të zakonshmit Liçaj, Hoxha, Janiçiç dhe Xhekson. Sa i përket Janiçiç, është në dyshim nëse në vend të tij mund të startojë Rrapa e në këtë rast, do të ishte Aleksi që spostohet në mesfushë. Mesfusha do të kontrollohet nga Ramadani e Rrapa në rolin e "digës", ndërsa Rroca para tyre në mbështetje të Radoviç e Milosavljev nga krahët që do të jenë në mbështetje të Shkurtajt me modulin 4-2-3-1. Për bluzinjtë, faktori më i rëndësishëm do të jetë njohja e kundërshtarit dhe mentalitetit nga vetë trajneri vlonjat, Mezani.
THEODHORI KALLUCI - Si gjithë aktorët dhe faktorët sportivë të qytetit të gurtë, edhe ish-trajneri i Luftëtarit në vitet 1994-1995 nuk e fsheh zhgënjimin e humbjes me Laçin. "Ishte ndeshje me dy fytyra, një Luftëtar i vendosur mirë taktikisht në pjesën e parë, ndërsa në të dytën pashë skuadër të shthurur. Edhe Laçi pati momente shpërqendrimi, por pas golit u shfaq i pjekur dhe i organizuar. Lëvizjet e stafit teknik pas minutës së 70-të ndëshkuan ekipin tonë. Është për të ardhur keq që ndëshkohemi nga goditjet standarde apo nga rivëniet anësore. Kjo sëmundje duhet kuruar, pasi s'po gjejmë derman", tha fillimisht Kalluci. Lidhur me sfidën e sotme, Kalluci tregohet optimist: "Në Vlorë, po të luhet si ndaj Tiranës, edhe pse humbëm 3-1, dhe Kastriotit, s'ka arsye për të mos marrë qoftë dhe një pikë. Korrigjimi sa më shpejt në lojën mbrojtëse dhe shfrytëzimi i momenteve për shënim është dhe duhet të jetë detyrë primare për stafin teknik. Unë besoj te puna e trajnerit Mezani", përfundoi Kalluci. Tomor Shehu