Elbasani gjen fitoren, thyen Bylisin në miqësore
Dovedan “ndëshkon” Mahmutajn, mbyll ndeshjen me 10 lojtarë
lbasani gjen fitoren në... miqësore. Edhe pse në aktivitet dhe mbi të gjitha të shtunën do të zbresë në fushë për të luajtur javën e 9-të të Kategorisë së Parë kundër Tomorit, për çudi verdheblutë kishin menduar që dje të zhvillonin një ndeshje. Kundërshtar kishin zgjedhur një ekip të Grupit B, pikërisht Bylisin. Skuadrat zbritën në kompleksin sportiv “Shefqet Lamçja” rreth mesditës dhe ky 90-minutësh u mbyll me shifrat 2-0 prej vendësve, që në 8 javë nuk e kanë provuar ende shijen e fitores. Ky duel më shumë u shërbeu trajnerëve, të cilët u dhanë minuta lojtarëve që deri më tani nuk kishin pasur shumë hapësira.
Ndeshja – Miqësorja nis vrullshëm për Elbasanin, të cilët ia dalin të kalojnë shumë shpejt në avantazh me anë të Sadikut, që brenda në zonë nuk gabon dhe e ndal topin në rrjetë. Përballja bëhet interesante, sepse skuadrat luajnë fort dhe krijojnë raste për të shënuar, por tregohen të pasaktë në mundësitë e tyre. Verdheblutë shtyjnë përpara me Sadikun, ndërsa miqtë provojnë me Muratajn dhe Hyskan që të kthejnë baraspeshën. Gjithsesi, fraksioni i parë i lojës mbyllet në shifrat minimale 1 me 0 për Elbasanin, me golin e Sadikut në minutën e shtatë. E dyta vazhdon me të njëjtin ritëm, por mungon goli i shpejtë si në
fraksionin e parë të lojës. Atëherë kur pritej kundërpërgjigjja e Bylisit, vendasit fitojnë një penallti me anë të Ballës, i cili pengohet brenda zonës. E merr përsipër goditjen Gica dhe nuk gabon. 2 me 0 për verdheblutë, por ka ende edhe 20-të minuta lojë
për miqtë që të shënojnë të paktën një gol. Minutat kalojnë dhe çdo gjë bëhet më e vështirë për miqtë, të cilët janë me një lojtar më pak, pas largimit nga loja të Mahmutajt, i cili gabon një rast të artë dhe Dovedon e nxjerr nga loja. Kështu, mbyllet gjithçka në shifrat 2 me 0, me Elbasanin që provon se çdo të thotë të fitosh, edhe pse në një miqësore.
Ndëshkimi - Edhe pse ishte një ndeshje miqësore, trajneri i Bylisit u “xhindos” me një nga lojtarët e tij. Në pjesën e dytë ishte Mahmutaj që, edhe pse doli i vetëm me portierin elbasanas, nuk shënoi dot. Kjo gjë nuk u përtyp nga Veljko Dovedan. Ai zgjodhi të luajë me një lojtar më pak minutat e mbetura, duke e nxjerrë nga loja sulmuesin. Ndoshta kjo, një formë për t’u treguar të tijve që edhe miqësorja duhet të merret me seriozitet dhe kush e merr lehtë do të përfundojë në stol.