Valverde: I lumtur për 1/8-at, Ikardi fantastik

"Me Interin na priste ndeshje fizike, ndaj s'e rrezikova Mesin"

“Mesi në tribunë? Një zgjedhje që e morëm së bashku si skuadër. Duhet të kujdesemi fillimisht për lojtarin: morëm parasysh edhe llojin e ndeshjes, intensitetin dhe numrin e madh të dyluftimeve. Në fund, vendosëm të mos rrezikonim. Dje në "San Siro", pavarësisht se mori "vetëm" barazimin kundër Interit (dhe pavarësisht se mungoi përsëri numri 10), Ernesto Valverde preu "biletën" për 1/8-at e Champions-it, dy ndeshje përpara fundit të fazës së grupeve. Në përfundim të 90', trajneri katalanas ka analizuar sfidën: "Zhvilluam një paraqitje fantastike. Erdhëm në fushën e Interit për klasifikim, donim fitoren për të siguruar vendin e parë. Bëmë gjithçka për tri pikët. Luajtëm në mënyrë të shkëlqyer, por na mungoi finalizimi, por ky është një virtyt i Interit, riorganizohet në momentet e fundit, e ka të skalitur në ADN: nuk dorëzohet kurrë. Jemi, megjithatë, të kënaqur sepse kërkonim kualifikimin dhe ia dolëm. Në pjesën e parë vuajtëm pas disa nga kundërsulmet e tyre, por luajtëm kundër një skuadre të madhe dhe bëmë lojën tonë. Nga Milano largohem i kënaqur".

MAURO, FANTASTIK - Valverde, më pas, është ndalur tek individualitetet: "Malkom? Shënoi gol me prekjen e parë, godet mirë me të dyja këmbët, shfrytëzoi më së miri rastin që iu dha. Kutinjo? Jam i vetëdijshëm për aftësitë e tij, mori përgjegjësi dhe ishte vazhdimisht aktiv, për fat të keq nuk arriti të shënojë. Suarez? Duhet të vazhdojë të kërkojë golin, u paraqit në mënyrë të shkëlqyer: avanconte dhe rikthehej në mbrojtje. Goli duhet kërkuar gjithmonë". Në fund, Valverde i ka thurur elozhe edhe Ikardit, që shënoi golin e barazimit për Interin: "Nëse do kishim luajtur me 12 lojtarë, do kishim fituar. Mauro është një sulmues i madh, por jemi të lumtur me atë çka arritëm. Goli në fund? Edhe pse duket sikur nuk është në fushë përgjatë gjithë ndeshjes, shfaqet në momentet finale me një perlë".