Liverpuli bie pa Shaqirin në Serbi
Anglezët dorëzohen nën presionin e "Marakanasë", i ndëshkon dy herë Milan Pavkov
Drithërimat e himnit të Champions-it të javës së katërt nisën nga Beogradi dhe antipasta europiane e së martës ofroi menjëherë surprizën më të madhe të mbrëmjes. Nga "Marakana" erdhi një asist i çmuar për PSG-në dhe Napolin, sepse Ylli i Kuqi i Beogradit hakmerret për humbjen e dy javëve më parë në "Anfield" (40), duke mposhtur kryesuesen e Grupit C deri në ato momente me 6 pikë dhe vështirësuar në mënyrë të papritur rrugën e kualifikimit të nënkampionëve të Europës.
RROTACIONI - Klop vendos t'i japë pak pushim Firminos dhe hedh Starrixhin përkrah Manesë dhe Salahut. Në transfertën e anglezëve mungon Shaqiri, të cilin trajneri e la në shtëpi pasi kërcënohej që të ishte shënjestra e tifozëve serbë pas festës me shqiponjë në golin e kundër Serbisë në Botëror. Të zotët e shtëpisë ia besojnë majën e sulmit Pavkovit, ende pa asnjë gol në kompeticion. Një zgjedhje e detyruar, për shkak të të dëmtuarit Boakie. Ndeshja kuptohet si do përfundojë ndoshta që prej minutës së 18të: Starrixh shpërdoron një rast nga vetëm 5 metra me portën e boshatisur, pas një krosimi të Manesë. Dy minuta më vonë, tjetër rast për sulmuesin anglez të preferuar në vend të Firminos, por e majta e tij devijohet në goditje këndi. Nga këtu nis monologu i serbëve. Dirigjenti i orkestrës është Pavkov, fillimisht me një goditje me kokë në qendër të zonës pas ekzekutimit të goditjes së këndit nga Marin (22') dhe shtatë minuta më vonë me një raketë tokë-ajër
nga jashtë zone, për të cilën përgjegjësia është edhe e Alisonit. Cërvena Zvezda, mbrojtja më e keqe momentale e Champions-it me 10 gola të pësuar, duket një tjetër skuadër: solide në mbrojtje dhe koncize në sulm dhe përfiton nga një ndeshje nën ritëm
nga Salah me shokë. Pjesa e dytë vijon në linjat e së parës, por me ritme me të ulëta. Pas vërshëllimës finale në Beograd, festa e 50 mijë tifozëve serbë është si në "San Nicola" 28 vite më parë, kur ngrinin trofeun e Kupës së Kampioneve përballë Marsejës.