Daja: Nuk meritonim më shumë

Trajneri i Flamurtarit, Ilir Daja, ka pranuar pas ndeshjes se skuadra e tij nuk meritonte më shumë ndaj gjirokastritëve. Në prononcimin për “SuperSport”, Daja komentoi edhe takimin e fundjavës ndaj Skënderbeut, skuadrës ku fitoi gjithçka. Ai dha edhe një herë arsyet pse u largua nga Korça dhe pranoi të niste një aventurë të re në Vlorë.

Ky rezultat nuk i ka përmbushur pritshmëritë apo jo? Rezultati nuk i përmbush pritshmëritë, por më shqetëson më shumë loja. Nuk kemi pasur manovrën e duhur për të shkuar në zonën e rrezikshme. Lodhja ishte e njëjtë për të dyja skuadrat. Kemi shumë punë për të bërë në manovrën sulmuese kur luajmë brenda në Vlorë. Tjetër shfaqemi jashtë, tjetër bëjmë këtu në fushën tonë. Bëjmë gabime në pasin e thjeshtë. Përgjegjësinë kryesore e marr vetë për këtë performancë të ekipit. Ajo që neve na shqetëson është vazhdimësia. Nganjëherë mund ta fitosh ndeshjen, pavarësisht se kundërshtari ishte më sipër sesa ne. Nuk meritonim më shumë se barazimi në këtë ndeshje.

Skuadra shprehet shumë më mirë jashtë fushe. Çfarë ndryshon në shtëpi?

Duhet të jemi më të thjeshtë dhe më të shpejtë kur luajmë në shtëpi, në mënyrë që të krijojmë hapësirat e duhura. Nuk mund të luajmë dot me sulmin në thellësi. Bushiç nuk merr thellësi. Duhet t’ia spostojmë lojën afër linjës fundore. Edhe në raste kur Bushiç shfaqet i lirë, humbasim më pas. Ekipi ka shkëputje, nuk ka një qëndrueshmëri në vazhdimësi. Pritshmëria e tifozëve tanë është shumë e madhe. Nuk jemi në gjendje psikologjike për t’iu dhuruar atë që ata kërkojnë.

A jeni gati për të mundur Skënderbeun të dielën?

Unë do të thosha që është një ndeshje shumë e vështirë. Kjo lloj performancë do na uli psikologjikisht. Do gjejmë forcë për ta motivuar ekipin. Skënderbeu është ekip i konsoliduar, kryeson bindshëm në futbollin shqiptar. Ka dhe Skënderbeu pika jo të forta dhe do të mundohemi që t’i shfrytëzojmë ato, për të rikuperuar pikët e humbura sot (dje).

A jeni penduar që u larguat nga Korça?

Unë nuk jam bërë pishman që u largova nga Korça. Nuk kisha më çfarë t’i jepja asaj skuadre kur arrin suksese në kampionat, Kupë dhe fazën e grupeve të Ligës së Europës. Nuk mund të vazhdoja, pasi ishte një Skënderbe që pret vendimin e KAS-it, por ishallah është në favor të tij, sepse do ishte një minus i madh nëse konfirmohej dënimi. Nuk e kthej kokën mbrapa, jam mirë, ndihem mirë, pavarësisht oshilacioneve. Mua më pëlqejnë sfidat e reja.

Mbështetja nga mesfushorët e qendrës ishte e pakët, çfarë nuk shkoi?…

Ajo ndodhi dhe për shkak se humbëm shumë energji pjesën e parë. Treshja jonë humbte energji edhe si pasojë e mosfunksionimit të filtrit të parë, Bushiç, Torasa dhe Musta. Duhet të ishin më agresivë. Ky ishte defekt, që as Batha, as Useini dhe as Mustafa nuk kishin freskinë e duhur për të shkuar te Bushiç, i cili u la vetëm.

Penalltia e padhënë në minutën e 9-të, keni një koment? Nuk po e diskutoj fare, do më kryqëzojnë. Nuk dua t’i krijoj alibi ekipit me të tilla gjëra.