"Mbrojtjes i duhet inteligjencë, asnjë 'revansh' ndaj Duros"

Bledi Shkëmbi u gëzohet pikëve, edhe pse e pranon që skuadra çedoi shumë gjatë pjesës së parë. Trajneri i Teutës, në intervistën e dhënë për "Gol pas Goli", analizoi gjithçka nuk shkoi siç duhet në këtë 90minutësh dhe sidomos te momenti i golit të disavatazhit. E pranon që skuadra ka probleme në mbrojtje dhe thekson se mungesa e inteligjencës bën që të jenë në një kohë vonesë. Edhe pse Klodian Duro e "thumboi" në fazën e parë, korçari thekson se fitorja e djeshme nuk ishte revansh për të...

Fitore me përmbysje, e merituat këtë herë?

Është e vërtetë, por do të thosha që edhe pjesën e parë ishim më mirë, krahasuar me ndeshjen që bëmë kundër ekipit të Tiranës. Një moment shpërqendrimi te goli i

Kamzës, kur mbrojtja nuk reagoi pas grushtimit të portierit. Por pjesa tjetër e lojës shkoi mirë, pasi përballë kishim një kundërshtar të vështirë.

Dikur Teuta vuante kur luante jashtë "Niko Dovanës" jashtë fushe, por duket se e tani e ka thyer edhe këtë...

Veç pikëve që kemi fituar këto javë, fakti që ekipi po luan mirë më jep optimizëm. Po zhvillojmë vetëm ndeshje jashtë dhe mendoj se kemi fituar besimin dhe shpresoj që të vazhdojmë kështu me këto rezultate.

Ju ndodhi e njëjta gjë si ndaj Tiranës. Skuadra hapet shumë, aty ku duhet të jetë më shumë e përqendruar. Mos duhet të jeni pak më shumë të kujdesshëm?

Pothuajse në çdo ndeshje, skuadra në momentet të caktuara është shumë e hapur, pra, nuk ka ekuilibër. Megjithatë, ne bëjmë maksimumin në stërvitje që të korrigjohemi, por ndoshta jemi të kondicionuar edhe nga rezultatet. U bë e dyta herë që i nisim ndeshjet në disavatazh 1-0 dhe kjo të detyron për t;u hapur. Mendoj se kjo është arsyeja. Skuadra shfaqi ritëm në pjesën e dytë, por duket sikur mbrojtësit janë një kohë me vonesë. Pse ndodh kjo? Futbolli nuk luhet vetëm fizikisht. Duhet të jesh inteligjent të lexosh situatat. Kjo na mungon deri diku dhe kjo nuk është pjesë taktike dhe nuk mund të ndreqet menjëherë. Ajo fitohet duket luajtur, kështu mund të përmirësohen. Në mbrojtje nuk kemi gjetur stabilitetin e duhur dhe ky është problemi më kryesor.

Duro ju "sfidoi" me karrierën në Kombëtare kur mori drejtimin e Kamzës. A ishte kjo një përgjigje për të sot (dje)? Jo, s'ka qenë përgjigje për asnjë. Ka qenë përgjigje për atë që ne stërvitemi përditë. Unë kam respekt për Klodian Duron, është një ishlojtar i Kombëtares shumë i mirë dhe do të bëhet edhe një trajner i mirë.