Tri fitore radhazi, Dore tregon sekretin e Besëlidhjes

Si çdo të mërkurë edhe të kësaj jave, Besëlidhja zhvilloi ndeshjen e kontrollit brenda familjes për të testuar formacionin që do të vihet përballë Korabit të shtunën në Peshkopi. Edhe në këtë takim, Besëlidhja do të luftojë për të ruajtur traditën e fitoreve, ndaj skuadra nën drejtimin teknik të lezhjanit Gledis Lani, i është nënshtruar një stërvitjeje intensive për t’u karikuar nga të gjitha pikëpamjet. Javët e fundit mbrojtësi guineas, Olivier Dore, nuk është aktivizuar gjatë minutave të plota në ndeshje, pasi ka pasur një dëmtim të lehtë muskulor. Por, për transfertën dibrane besohet se do të jetë në formë të plotë dhe këtë e konfirmoi gjatë një bisede për “Panorama Sport”. “Pas një dëmtimi muskulor, besoj se deri në fundjavë do të jetë në formën më të mirë për të qenë i gatshëm plotësisht për formacionin anti- Korab. Duke analizuar tetë javët e para të kampionatit, skuadra ka pasur dy anë medaljeje, startin negativ dhe tashmë ecurinë perfekte me tri fitore radhazi. Duke shpresuar në vijueshmërinë e kësaj rruge të suksesshme, besoj se edhe ndaj Korabit do të kemi sukses, por që të arrihet ky na duhet shumë punë në seancat stërvitore për t’u karikuar maksimalisht dhe këto energji të derdhen me rendiment sa më të lartë në arenën e blertë në fushën e Korabit. Shumica dërrmuese e futbollistëve për të shtunën është në formë, këtë po e tregojnë gjatë seancave stërvitore, konkretisht sot ( dje) në ndeshjen e testit që luajtëm në stadium”, e mbylli prononcimin e tij për gazetën mbrojtësi shtatlartë i Besëlidhjes, guineasi Olivier Dore. Preng Gjikola