Duel Tiranash, në fund triumfon... SHKB-ja
Trajneri Borova: Nuk i dhamë asnjë shans kundërshtarit
Shoqata e Kubit Tira na vazhdon ecurinë e shkëlqyer në kampionatin kombëtar të basketbollit për femra. Vajzat bardheblu që drejtohen nga trajneri Erdal Borova siguruan triumfin e radhës, duke mposhtur në derbin e kryeqytetit, Shoqatën e Basketbollit Tirana. Një sfidë tepër emocionuese dhe me shumë rivalitet, por që në fund ajo që buzëqesh është skuadra e SHKB Tiranës, e cila fiton me rezultatin 84-78 dhe vijon të mos njohë asnjë humbje në këto 6 javë të para. Takimi nisi me shumë vrull për SHKB Tiranën, e cila që në minutën e parë kalon në epërsi 11-1 falë pikëve të realizuara nga Milovanoviç, Popoviç dhe Erta Bujari. Më pas është SHB Tirana që reagon dhe në një hark shumë të shkurtër kohor, falë malazezes Nikpajleviç ngushton shifrat në 1213. Në fund të periodës së parë është Xhanaj, ajo që i jep për herë të parë avantazhit SHB Tiranës, por Erta Bujari me një goditje për 3 pikë rikthen ekipin e Erdal Borovës sërish në avantazh, duke e mbyllur periodën e parë 2019. Perioda e dytë e takimit starton me të dyja skuadrat që i përgjigjen pikë për pikë njëra-tjetrës, por më pas ajo që tregohet më e saktë është Tirana e Mirza Alibegajt, ku falë 3 goditjeve të sakta për 3 pikë nga Mehmeti dhe një 3pikëshi nga Çorto arrin të kalojë në avantazh 33-28, por në fund të periodës është kapitenia Bujari që ngushton shifrat për SHKB Tiranën në
45-46. Me këtë rezultat në favor të SHB Tiranës mbyllet edhe pjesa e parë e ndeshjes. SHKB Tirana futet më e vendosur në fushë pas pushimit dhe në periodën e tretë nis të dominojë, ndërkohë që SHB Tirana vuan disi lodhjen, pasi është aktivizuar gjatë gjithë kohës i njëjti formacion. Kjo periodë do të rezultojë decizive ku SHKB Tirana fiton 22- 12 dhe shkon në pushimin e tretë me rezultatin 67- 58. Avantazh të cilin e administron më së miri në fraksionin e fundit dhe e gjithë sfida mbyllet me shifrat 8478 për SHKB Tiranën. Në këtë sfidë ra në sy edhe prezenca e basketbollistëve të Teutës si Kops, Miranoviç, Mejer, Ullsion apo dhe Lasku të cilët ishin të pranishëm në sallën sportive "Farie Hoti".
FLET TRAJNERI BOROVA - Pas fitores së arritur nga skuadra e tij, trajneri Erdal Borova ishte i kënaqur me paraqitjen e ekipit dhe për "Panorama Sport" u shpreh kështu: "Ky sezon ka nisur mjaft mirë për skuadrën tonë, ku e mbyllëm fazën e parë me pesë fitore dhe pa asnjë humbje. Gjithashtu, arritëm ta nisim edhe fazën e dytë në mënyrën më të mirë, duke marrë një fitore ndaj një rivali direkt si SHB Tirana. Megjithatë, kampionati është i gjatë dhe ekipi ka vend të përmirësohet sidomos në aspektin mbrojtës. Kemi krijuar një avantazh të mirë që do të na shërbejë edhe për turet e tjera. Sot (dje) dua t'i uroj vajzat për shpirtin e garës që treguan në fushë dhe që për asnjë moment nuk ia dorëzuan lojën dhe nuk i dhanë asnjë shans për ta fituar lojën".