Strakosha kualifikon Lacion, Grezda 10 minuta me Rejnxhërsin

Europa Ligë/ Zhirud gol pas 5 muajsh, Uellbek thyen kaviljen

Lacio ka arritur të marrë një fitore të vyer në shtëpi përballë Marsejës me rezultatin e ngushtë 2-1. Me këtë ndeshje, skuadra laciale ka mbyllur çështjen e kualifikimit dhe tani ndoshta do të synojë vendin e parë që mbahet nga Eintrahti i Frankfurtit. Megjithatë, ndeshja nuk ishte e lehtë, e cila mund të kishte përfunduar edhe në barazim, po të mos ishte Strakosha ai që do të bënte një pritje spektakolare në fund të ndeshjes, duke shpëtuar skuadrën e tij nga goli i barazimit.

Nota 7.5 - Thomas Strakosha është vlerësuar me notën 7/5. "Vetëm një moment në pjesën e parë, në të cilën tregon vendosmëri me një ndërhyrje fantastike për të ruajtur kuadratin ndaj Sakait. Në fund të ndeshjes bën një tjetër ndërhyrje decizive ndaj Thauvin. I jashtëzakonshëm", ka qenë shpjegimi i notës për portierin kuqezi. Deklarata - Strakosha nuk fshihet më sa u përket objektivave të Lacios në Europa Ligë. "Besuam se mund t'ia dilnim dhe për fat të mirë ia dolëm që sot ( dje). Kemi bërë një ndeshje të madhe. Ku mund të arrijmë? Duhet që të bëjmë më mirë sesa një vit më parë, ku u eliminuam keqazi në çerekfinale. Mund të ndodhë gjithçka, por nëse themi do shkojmë në finale, nuk do të ishte përgjegjësi për të na fajësuar po nuk ia dolëm", ka deklaruar portieri i Kombëtares.

Rejnxhërs - Skuadra skoceze është mundur 4-3 në transfertë me Spartën e Pragës. Ndeshje në të cilën Grezda është aktivizuar vetëm pas minutës së 82-të, kur rezultati ishte vendosur dhe nuk ndryshoi deri në fund.

Çelsi - Olivier Zhirud mjaftoi me një gol që Çelsi të fitonte 1-0 ndaj Bates. Për francezin mori fund "thatësira" prej pesë muajsh pa shënuar, ndërkohë që "blutë e Londrës" shkojnë në kuotën e 12 pikëve pas katër

takimeve në Grupin L.

Arsenal - Sfida e "topçinjve" ndaj Sportingut që përfundoi 0- 0, ka nisur me "horror". Një dyluftim ka sjellë dëmtimin e rëndë të Dani Uellbek në minutën e 30-të, si pasojë e të cilës ka thyer kaviljen. Është dashur ndërhyrja e mjekëve dhe lojtari ka pasur nevojë për oksigjen.