Sfida e shekullit, Boka-River nxeh Argjentinën
Kupa Libertadores/ Sot finalja e parë, ora 21:00
Një komb i tërë i paralizuar në pritje të një sfide epike. Sakaq, pjesa tjetër e botës vrojton me kureshtje. Numërimi për "Superklasiken" argjentinase që do përcaktojë fituesin e 59- të të Kupës Libertadores po shkon drejt fundit për "aktin" e parë mes Boka Zhuniorsit dhe River Plejtit, në program sot në "Bombonera" (ora 21:00 shqiptare; etapa e dytë do luhet në "El Monumental", më 24 nëntor në po të njëjtin orar). Ndeshja do të transmetohet në Shqipëri nga SuperSport. Derbi më i nxehtë i futbollit, portret perfekt i kulturës e traditës së një populli, i cilësuar jo më kot si
"ndeshja e shekullit", "përballja finale" apo "apokalipsi". HISTORI E RIVALITET - "The Guardian" disa vite më parë e përfshiu në listën e dhjetë eventeve për t'u ndjekur së paku një herë në jetë. Boka-River: një rivalitet që zgjat prej 110 vitesh, ku pasqyrohen edhe ngjarjet
historike të Argjentinës dhe një populli që e përjeton si asgjë tjetër. Nga "Klasikja" e parë e zhvilluar në 1908- ën, kanë pasuar 367 të tjerë (368 në total) mes ndeshjeve zyrtare dhe miqësoreve ( që aspekte miqësore, megjithatë, kanë pasur shumë pak). Precedentët në
Kupën Libertadores (24) kanë lënë kujtime të paharrueshme, nga gjysmëfinalja e 2004-ës e shënuar nga goli historik i Tevez, e fituar në fund nga "xeneize"-t me penallti deri te skandali i 2015ës, me sfidën që u ndërpre në fillim të pjesës së dytë për shkak të një sulmi me gaz lotsjellës në dëm të lojtarëve të Riverit (e mbyllur me humbjen në tavolinë të Bokas).
SHIFRA REKORD - Një finale Libertadores mes Bokas e Riverit gjeneron një entuziazëm më të lartë edhe se finalet e Champions-it. Asnjë event futbollistik në botë, pra, nuk krahasohet me "Superklasiken" argjentinase, jo më kur flitet për një finale të Libertadoresit, ndër të tjera e fundit që do zhvillohet me dy takime. Një ide krijohet nga shifrat: 1.080 gazetarët e akredituar nga 150 tabloide të 25 vendeve të botës; do transmetohet në 100 shtete, ndërsa çmimet e biletave të rishitura në internet kanë kapur kuotën e rreth 35.000 eurove... Janë, sakaq, dy skuadrat më të shtrenjta të kontinentit: 110 milionë euro Boka, 75 Riveri. Protagonistët pritet të jenë Kristian Pavon, sulmuesi 22 vjeçar i Bokas (40 milionë euro klauzolë) dhe Ezekiel Palasios, mesfushori 20-vjeçar i Riverit (vlen vetëm 15 milionë). 1.300 do jenë agjentët e policisë dhe rreth 500 kujdestarët e stadiumit që do mbajnë nën kontroll rreth thuajse 300 ultrasit e pranishëm. Për të mos rrezikuar "apokalipsin", jo vetëm në kuptim metaforik.