Autoriteti i Konkurrencës hesht për kontrollin në FSHF
Autoriteti i Konkurrencës nuk ka pranuar të reagojë dje për kontrollin më të fundit në FSHF, nga ku ka hapur edhe një hetim lidhur me shitjen e së drejtës televizive të Kategorisë Superiore. "Panorama Sport" ka kërkuar zyrtarisht gjatë së prem tes një reagim në këtë institucion, por s'ka marrë një përgjigje. Kujtojmë që Autoriteti i Konkurrencës është organ publik i pavarur në kryerjen e detyrave të veta. Ai ka filluar veprimtarinë e tij më 1 mars 2004 në bazë të ligjit Nr.9121 datë 28.07.2003 "Për Mbrojtjen e Konkurrencës". Qëllimi i ligjit është mbrojtja e konkurrencës së lirë dhe efektive në treg, si një e mirë publike. Autoriteti i Konkurrencës është i ngarkuar me ligj për fillimin e procedurave paraprake hetimore me nismën e tij.
Ligji përcakton rolin që duhet të luajë Autoriteti i Konkurrencës për rregullimin e veprimtarisë ekonomike në bashkëpunim me organet e administratës qendrore dhe vendore, entet rregullatore dhe institucionet e tjera. Ky ligj është i zbatueshëm në të gjithë sektorët e ekonomisë për të gjitha ndërmarrjet private dhe shtetërore, që e ushtrojnë veprimtarinë e tyre në territorin e Republikës së Shqipërisë, si dhe për ndërmarrjet që veprimtarinë e ushtrojnë jashtë këtij territori, por pasojat e saj ndihen në tregun shqiptar. Puna e AK-së mbështetet në tri shtylla kryesore, të cilat përcaktojnë mbrojtjen nga konkurrenca: Marrëveshjet e ndaluara; Abuzimin me pozitën dominuese; Bashkimet ose përqendrimet e ndërmarrjeve; Autoriteti i Konkurrencës përbëhet nga Komisioni si organ vendimmarrës, i përbërë nga pesë anëtarë të zgjedhur nga Kuvendi i Shqipërisë dhe Sekretariati si organ ekzekutiv.