“Kisha frikë të vrapoja, jam vetë fajtori...”
Amir Abrashi është rikthyer në stërvitje. Pas një kohe të gjatë mungese për shkak të operacionit pas këputjeve të ligamenteve, mesfushori i Kombëtares shqiptare po “ngroh motorët” për të zbritur në fushë. Në një intervistë të dhënë për mediat gjermane, ai tregon momentin negativ dhe makthet e kaluara pas këtij dëmtimi. Tregon frikën kur nisi të vraponte, por pranon se ka faj vetë në dëmtim... Si ndihet Abrashi tani që e ka lënë pas dëmtimin? Jam shumë i kënaqur që rikthehem pas një kohe të gjatë në stërvitje me skuadrën. Shpresoj që të rikthehem sa më shpejt dhe të jap kontribut në këtë sezon.
A mendoni që do të ktheheni sërish në formën e mëparshme?
Në stërvitjet e para kisha shumë frikë, por gjithçka shkoi shumë mirë dhe tani jam gati për të marrë më shumë ngarkesë, në mënyrë që të kap ritmin e shokëve të skuadrës.
Ju jeni nga ata lojtarë që luftoni për çdo top dhe nuk e tërhiqni kurrë këmbën. Mendoni se keni pak faj në dëmtimet që keni pësuar? Sigurisht që është edhe pak faji im për dëmtimet e shpeshta që kam pësuar gjatë kësaj kohe, sepse unë luftoj për çdo top dhe në çdo cep të fushës. Por, me Hertën ishte diçka ndryshe, pasi dëmtimi ishte më i rëndë. E rëndësishme është që për momentin gjithçka është si më parë. Keni punuar me ekipin e dytë gjatë kësaj kohe. Ju kanë shërbyer këto stërvitje?
Këto stërvitje me ekipin e dytë më kanë shërbyer për të më rritur vetëbesimin dhe për të marrë minutat që ka nevojë çdo lojtar. Do të vazhdoj të punoj për t’u rikthyer sa më parë nën urdhrat e trajnerit në mënyrë që të ndihmoj skuadrën time.
Kur mund të riktheheni me skuadrën e parë? Objektivi im është të jem gati për pjesën e dytë të sezonit. Shpresoj që gjërat të shkojnë ashtu siç duhet.
Çfarë keni bërë gjatë kësaj kohe?
Kur nuk isha i dëmtuar nuk mendova fare për futbollin për një kohë dhe iu përkushtova familjes. Pastaj, nisa që të punoj fort për t’u rikthyer sa më shpejt dhe të rifitoja formën.