Kamza thyen Tiranën, kampionët në krizë
Amerikani Flojd, lojtari i ndeshjes me 41 pikë të shënuara
Kamza Basket ka marrë revanshin ndaj Tiranës, teksa e ka mundur me 4 pikë diferencë, në një superndeshje që ka kënaqur jo vetëm lojtarët në fushë, por edhe publikun e pranishëm. Ndeshja nis me dy gjuajtje të lira të fituara nga kamzalinjtë, ku Çela realizon vetëm njërën, por më pas është Bruno Daliu që fiton edhe ai dy gjuajtje të lira ku gjithashtu realizon vetëm njërën. Koshin e parë të takimit nga aksioni do ta shënojë Edmundo për kamzalinjtë, të cilët marrin kryesimin e pikëve për të mos u ndalur deri në fund. Kështu, sfida ka nisur me shumë rivalitet nga të dyja skuadrat, por perioda e parë u takon kamzalinjve, të cilët e fitojnë me diferencën e një pike 24-23. Në të dytën është lojë
më e mirë sërish për vendësit që shkëputen 23-17 dhe mbyllin pjesën e parë me 7 pikë diferencë, 47-40. Në fillimin e fraksionit të dytë, skuadra e Tiranës arrin të përmbysë dhe kalon në epërsinë e një pike 56-57, duke fituar periodën 26-31, por jo në rezultatin e
përgjithshëm teksa kryeson Kamza 73-71. Perioda e fundit është nga më të bukurat, ku ka rivalitet midis Karajt dhe Flojd që realizojnë secili nga 5 trepikësha, por gjithsesi rezultati përfundimtar shkon për vendësit që e fitojnë takimin 86-82. Flojd ishte lojtari i ndeshjes. Ai realizoi 11 kosha me vlerë trepikëshe dhe 4 kosha me vlerë dypikëshe, duke u bërë pikëshënuesi më i mirë i takimit, me 41 pikë. Gerti Shima i kampionëve të Tiranës ka qenë i dëmtuar dhe ka luajtur duke çaluar pothuajse gjatë gjithë takimit.
FLASIN PROTAGONISTËT - Lojtari më i mirë në parket dhe protagonist për fitoren e kamzalinjve, ishte amerikani Donald Flojd. Ai pas ndeshjes u shpreh kështu: "Ishte një takim i fortë dhe i rivalizueshëm. Më vjen mirë që u bëra protagonist për këtë fitore. Te Kamza ndihem mirë e komod. Ka djem të mirë e që më respektojnë. Mundohem të jap gjithnjë maksimumin në ndeshje". Ndërsa, kapiteni i Tiranës, Erkand Karaj, e komentoi kështu humbjen e ekipit të tij: "E kishim vlerësuar mjaft këtë takim dhe e kishim parashikuar se do të ishte i vështirë. Kemi pasur përballë një Kamzë të përforcuar. Ndoshta lodhja, ndoshta dhe shpejtësia ndikuan që skuadra jonë humbi. U munduam që të përfitonim nga disa sekuenca të lojës, por Kamza e meritoi fitoren".