Vllaznia nuk do "blofe", ndaj Ilirisë për të thelluar rekordin
Vllaznia kërkon "marshimin". Shkodranët nuk duan të ndalen as në ndeshjen përmbyllëse të fazës së parë, pasi tentojnë që të thellojnë diferencat në Grupin A të Kategorisë Së Parë. Kur janë luajtur 8 javë, kuqeblutë njohin vetëm një barazim kundër Shënkollit, ndërsa në të gjitha ndeshjet e tjera kanë marrë maksimumin. Për të ruajtur ritmin, nuk kanë ndërmend t'a falin as Ilirinë. Edhe pse ndeshja luhet në transfertë, të besuarit e Hasan Likës i kanë marrë që të gjitha masat që ta kalojnë me sukses këtë 90-minutësh. Lojtarët janë stërvitur maksimalisht gjatë gjithë javës dhe janë besimplotë para këtij dueli. Kjo është kuptuar qartë edhe prej deklaratave të dhëna gjatë ditëve të fundit, duke filluar nga Lika, Zogaj, Sherri, por edhe numri dy i stolit, Elvin Beqiri. Edhe pse e pranojnë se rrugëtimi nuk është kurrsesi i lehtë në këtë kategori, janë më shumë se gati që të kalojnë çdo pengesë për t'u ngjitur në mesin e më të mirëve Vllazninë. "Nuk do të jetë një ndeshje e lehtë. Iliria është një ekip i vështirë dhe kryesisht në fushën e vet. Por ne, si në çdo përballje do të kërkojmë që të marrim maksimumin e pikëve", kanë thënë në unison kuqeblutë. Në të njëjtën linjë lojtarët kanë qenë edhe gjatë analizës së zhvilluar prej trajnerit, ku kanë studiuar me pamje filmike kundërshtarin. Ato janë të bindur se java e 9-të, do të siglojë të tetën fitore sezonale.
GRUPI - I gjithë ky optimizëm vjen edhe prej organikës. Stafi teknik do të ketë një grup më të plotë në ndeshjen që do të luhet të hënën në orën 14:00 në "Redi Maloku". Me përjashtim të qendërmbrojtësit Renato Malota (i cili nuk arriti që të rikuperohej në kohë), por edhe Bardullës dhe Selimajt (që do të jenë edhe për pak javë jashtë fushave të blerta), Hasan Lika ka të gatshëm që të gjithë lojtarët e tjerë. Kjo është një shenjë pozitive për teknikun, pasi i jep mundësinë që të përzgjedhë më të mirët për formacionin. Vllaznia edhe sot do të kryejë seancën e fundit për përballjen me Ilirinë dhe më pas pritet që të zhvendoset në Fushë-Krujë, ku edhe do të grumbullohet. Admir Uruçi