Tomori nis ngjitjen, arbitri “fundos” Elbasanin
Gjyqtari përsërit penalltinë, verdheblutë e humbasin
lbasani ka humbur edhe ndaj Tomorit 0-2, duke mbetur në vend të fundit me një pikë. Beratasit kanë marrë një 3pikësh të rëndësishëm dhe në fund të takimit kanë festuar bashkë me tifozët. Nga ana tjetër, sportdashësit verdheblu janë larguar të mërzitur nga stadiumi, ndërsa për ekipin po vështirësohet gjithçka e më shumë për sa i përket mbijetesës. Elbasani e mbylli fazën e parë vetëm me një pikë.
NDESHJA
Takimi ka nisur me rast që në fillim, ku në minutën e 3-të, nigeriani i Elbasanit, Ezike, gjuan jashtë kuadratit. Në minutën e 9- të, Koleci i Tomorit brenda zonës mike godet jashtë kuadratit vendës. Elbasani është më aktiv në lojën e tij dhe në minutën e 18- të, Ukaj gjuan nga larg, por topi përfundon mbi traun e portës. Do të vinte minuta e 33- të dhe ka një tjetër rast për Elbasanin. Vazhdojnë të luajnë mirë verdheblutë, që në minutën e 42- të janë pranë golit me anë të Ukaj që gjuan, por pret portieri mik. Në fund të pjesës së parë përsëri Ukaj që nga jashtë zone gjuan, por jashtë. Pjesa e parë është mbyllur në barazim pa gola. Edhe pjesa e dytë ka nisur mirë për Elbasanin që në minutën e 48- të i afrohen golit me Ezikenë, por pa arritur të shënojnë. Në minutën e 59-të do të vijë goli i Tomorit, me një sulm të shpejtë nga krahu i djathtë, Sharavolli shfaqet i lirë në zonën vendëse dhe shënon qetësisht. Shokohen lojtarët e Elbasanit dhe në minutën e 65- të, beratasit mund të shënonin dhe golin e dytë, ku Çaço në hyrje të zonës gjuan, por topi ndalet në traversë. Pas një minute reagon Elbasani ku Arsen Lleshi gjuan bukur, pret portieri mik dhe i shpëton topi nga dora, Ezike shënon nga afër, por për gjyqtarin Zhuli është faull në dëm të Kaloshit. Do të vinte minuta e 68-të ku një nga mbrojtësit miq prek topin me dorë dhe gjyqtari nga Tirana Endrit Zhuli akordon penallti. Nga pika e bardhë Jurgen Lleshi gjuan dhe shënon, por arbitri e anulon, pasi lojtarët kanë hyrë në zonë pa vërshëllyer gjyqtari. Përsëritet penalltia, përsëri Jurgen Lleshi, por këtë herë gabon
dhe pret portieri Kaloshi. Dëshpërohen verdheblutë që humbin një rast të artë për të barazuar. Në minutën e 90- të, një nga lojtarët miq pengohet në zonë dhe penallti për Tomorin. Nga pika e bardhë Mujkiç tregohet i saktë dhe 0-2 për miqtë.