Toska: Fitorja utopi, të luajmë denjësisht
“Shpresojmë të kënaqim publikun, rivalët tepër të fortë”
ombëtarja shqiptare e basketbollit për femra ka nisur grumbullimin në kuadër të dy ndeshjeve të fundit kualifikuese për kampionatin europian 2019. Ekipi kuqezi i drejtuar nga trajneri Viron Toska po vijon me përgatitjet në qytetin e Korçës. Vajzat kuqezi do të luajnë në Tiranë më datë 17 nëntor përballë Hungarisë, ndeshje e cila do të zhvillohet në sallën sportive “Feti Borova” në orën 17:00, ndërsa më 21 nëntor në orën 18:30 do të kenë sfidën e fundit në transfertë ndaj Lituanisë. Në prag të këtyre ndeshjeve, trajneri Viron Toska, në një prononcim për “Panorama Sport”, rrëfen sesi po shkon përgatitja e skuadrës: “Deri tani faza përgatitore këtu në Korçë po shkon shumë mirë, ku po stërvitemi në kushte të shkëlqyera dhe nuk na mungon asgjë si për sa i përket akomodimit, ushqimit dhe stërvitjes. Vajzat që kam në dispozicion po punojmë mirë dhe me seriozitet të plotë dhe jam shumë i kënaqur me to”. Në këtë grumbullim Shqipëria ka edhe dy mungesa, ku Zykaj dhe Nikpajleviç ende nuk i janë bashkuar ekipit: “Elektra Zykaj nuk i është përgjigjur ftesës dhe të them të drejtën nuk e di arsyen, ndërkohë Jelena Nikpajleviç po pret ende konfirmimin nga FIBA, në mënyrë që edhe ajo të jetë e gatshme për të luajtur dhe sot ( dje) do t’i bashkohet skuadrës”. Më pas trajneri vlonjat tregon edhe objektivat që ka Kombëtarja e femrave në këto dy ndeshje të fundit kualifikuese: “Jemi në një grup jashtëzakonisht i fortë, me kundërshtarë të një niveli botëror, megjithatë ne do të bëjmë më të mirën tonë në këto ndeshje ku do të kërkojmë të zhvillojmë një lojë sa më të mirë që të bëjmë një paraqitje sa më dinjitoze të basketbollit tonë. Ne kurrsesi nuk pretendojmë të fitojmë përballë këtyre kundërshtarëve që kemi në grup, pasi do të ishte çmenduri të mendojmë një gjë të tillë, duke parë që janë ekipe të një niveli botëror. Megjithatë, ne do të japim më të mirën tonë në fushë për të gjithë ata që na mbështesin dhe do të vijnë të na shohin”, përfundon trajneri i Kombëtares shqiptare të basketbollit për femra. Kujtojmë që këto janë dy ndeshjet e fundit në grup për Shqipërinë, e cila në katër sfidat e zhvilluara ka pasur rezultate zhgënjyese, ku është mundur me rezultate të thella nga Rusia, Hungaria dhe Lituania.