Fetel, shtatë “numrat” e krizës
Ferrari beson që është viti më i mirë nga 2008, shifrat thonë të kundërtën
Historia përsëritet, pasi edhe në vitin 2018 gara e Monzës bëhet sërish fillimi i një krize të thellë për Sebastian Fetel dhe për Ferrarin. Përjashtojmë këtu Kimi Raikonen, i cili në mënyrë paradoksale që nga çasti kur u njoftua që nuk do të jetë më pilot i "kokëkuqes" ka pasur rezultate të mira. Numrat nuk thonë gjithçka, por kur është rasti për të treguar një tendencë negative apo pozitive janë një tregues shumë i qartë. Pas fitores së arritur në garën e 13-të, në Çmimin e Madh të Belgjikës, Fetel renditej i dyti në kampionat me 214 pikë (16,46 pikë mesatarisht për garë), i shkëputur me 17 pikë nga Ljuis Hamilton i vendit të parë. Në atë periudhë, Raikonen kishte vetëm 146 pikë (11,23 mesatarisht në çdo garë), ndërsa Vershtapen renditej i pesti me 120 pikë (9,23 pikë për garë). Më pas erdhi Çmimi i Madh i Italisë, një e diel fatale për Sebastian Fetel, e cila më vonë do të rezultonte edhe si pikënisja e krizës së thellë për pilotin gjerman. Nga ajo ditë gjermani i Ferrarit u kthye në një pilot lehtësisht të kalueshëm për rivalin e tij, Hamilton. Numrat për Fetel nga ajo ditë e deri më sot janë vërtet shqetësues edhe pse ka nga ata që në skuderinë
italiane e konsiderojnë si sezonin më të mirë në radhët e Ferrarit nga 2008 e deri më sot. Në shtatë garat e fundit Hamilton ka grumbulluar 152 pikë (mesatarisht 21,71 për çdo garë), Vershtapen 114 pikë (16,28 për garë), në vend të tretë Kimi Raikonen
me 105 pikë ( 15 pikë për garë), më pas Botas me 93 pikë, ndërsa i pesti është Sebastian Fetel me 88 pikë (12,57 për garë). Një numër jashtëzakonisht inferior pikësh që tregon se çfarë fundsezoni falimentues ka pasur për të, më keq edhe se
viti 2017, pasi një vit më parë Fetel kishte dhënë disa "sinjale jete", ndërkohë që aktualisht ai është i zhytur në rezultate shumë të dobëta. Po ta krahasojmë me ecurinë e Fernando Alonsos në kohën kur ishte në radhët e Ferrarit, rezultatet janë shumë
inferiore për gjermanin, pasi Alonso në këtë periudhë ka pasur thuajse gjithmonë dyfishin e pikëve në raport me kolegun e skuadrës dhe në dy raste ka luftuar deri në garën e fundit për titullin. Por, te Ferrari vazhdojnë ende të besojnë se ky është sezoni më i mirë që nga viti 2008. Gara e së dielës e zhvilluar në Brazil tregoi edhe një herë tjetër momentin aspak të mirë që po kalon piloti
gjerman i Ferrarit, dhe vendi i gjashtë i arritur është një tregues i qartë i ecurisë mjaft të dobët që ai po kalon në këto muaj të fundit. Formula 1 për vitin 2018 do të mbyllet me Çmimin e Madh të Abu Dabit, garë e cila do të ketë vetëm vlerë statistikore, pasi çdo gjë ka përfunduar si për titullin e pilotëve, të cilin e fitoi Hamilton, ashtu edhe për atë të konstruktorëve që u fitua nga Mercedes.