Apolonia s’po bind, ish-trajnerët: Nuk kanë bomber
“Të lexueshëm në sulm, Meto&CO të marrin përgjegjësi”
ategoria e Parë ka ulur siparin e fazës së parë dhe fierakët, në të katërtin sezon radhazi në këtë kompeticion, ndodhen në pozicion komprometues dhe larg objektivave e mundësive që kanë. Statistikat dëshmojnë për Apoloninë më të dobët të katër sezoneve të fundit, ndonëse në ekip ka lojtarë cilësorë dhe një trajner me grintë e ambicie për sukses. Skuadra ka çeduar në rezultate dhe ky fakt është kthyer gati në makth për bardhejeshilët. Gjithsesi, nuk e kanë humbur toruan, por po punojnë fort për të bërë kthesën e pritshme. Një analizë për ecurisë e Apolonisë gjatë fazës së parë të këtij edicioni vjen në “Panorama Sport” prej trajnerëve që e kanë drejtuar këtë ekip gjatë 4 sezoneve të fundit, më së paku në 9 javët e para.
ARTAN MËRGJYSHI ( 2015- 2016)
Trajneri që ka grumbulluar më shumë pikë në këtë listë është Artan Mërgjyshi. Është ai që solli në Fier Uzunin dhe Krasniqin, dy lojtarë që jo vetëm u formuan tek Apolonia, por u bënë edhe “beniaminë” të tifozërisë fierake dhe “vrasës” të portave kundërshtare. “Ndonëse kam pasur angazhime të tjera, nuk e kam lënë jashtë vëmendjes ecurinë e Apolonisë. Po, duhet të ishte më lart, sepse ka skuadër të mirë. Unë e njoh mënyrën sesi punohet
atje, njoh aftësitë e trajnerit Miho dhe kam konsiderata shumë pozitive, sepse kemi punuar bashkë. Ka një frymë të mirë dhe për të gjitha këto mendoj se duhet të ishte një Apoloni konkurruese për në Superiore, por pikët stonojnë. Është një ekip që luan mirë, krijon volum loje dhe e dominon kundërshtarin, por vuan në finalizim, pasi i mungon një sulmues eksperience për golin. Gjata ka cilësi të mira, por duhet të punojë fort dhe unë besoj se një ditë ai do të bëhet. Megjithatë, mendoj se me këtë grup dhe me ndonjë përforcim në janar, skuadra i ka mundësitë e plota për t’u ngjitur në nivele të dëshirueshme”, deklaron Mërgjyshi.
ELIDON
( 2016- 2017)
Skuadra pësoi “revolucion” gati rrënjësor në përbërje dhe pati jo pak probleme për t’u konsoliduar dhe funksionuar si grup në kohën e Elidon Demirajt. Një ekip i përvuajtur, por me shpirt gare. “Kam qenë i fokusuar tek Albpetrol dhe jo fort pranë zhvillimeve në Fier, por nuk është se më ka munguar interesi për Apoloninë. Tek e fundit, unë jam një tifoz i saj.
DEMIRAJ
Ekipi ka lojtarë të rinj, të talentuar dhe me të ardhme, që mbase duan kohën e tyre dhe jam i bindur se do e kalojnë këtë fazë, por nuk mungojnë as lojtarët e përvojës. Për më tej? E theksoj se unë gjykoj nga jashtë, por mendoj se i kanë të gjitha mundësitë për të dalë nga kjo krizë a minikrizë, sepse Apolonia ka lojtarë përvoje, si: Meto, Nako, Hysenshahaj etj., që mund ta marrin skuadrën për dore drejt suksesit”, u shpreh Demiraj.
NDRIÇIM KASHAMI ( 2017- 2018)
U përball gati me të njëjtën situatë si paraardhësi i tij Demiraj në fillim të sezonit: riformatim thelbësor i skuadrës, por “liberali” Ndriçim Kashami “shtrëngoi nofullat” dhe iu përvesh sfidës. “Ku qëndron problemi i kësaj Apolonie? U larguan disa lojtarë titullarë, si: Dimo, Broshka
etj., që ishin baza e ekipin. Mendoj se skuadrës i mungon fantazia, befasia dhe përqendrimi te loja, jo te stërvitja. Apolonia është një ekip i parashikueshëm lehtë në fushë, ka psikologji të dobët dhe sulme të lexueshme. Pa ma lexuar si egoizëm, tani po flas si dashamirës i Apolonisë, jo si ish-trajner i saj dhe në këtë kontekst them se vjet kjo skuadër qe e paparashikueshme në atë që prodhonin në fushë Dimo e Broshka, Krasniqi dhe Mihana apo dhe të tjerë. Apolonia kishte disa lojtarë goli, ndërsa këtë vit është vetëm Gjata, një lojtar i talentuar, por i vetmuar, sepse nuk ka suportin e duhur nga pjesa tjetër e skuadrës. Por, pavarësisht kësaj gjendjeje, besoj se kjo skuadër dhe trajneri i kanë të gjitha mundësitë për të reaguar, nëse bëjnë korrigjimet dhe përforcimet e duhura”, përfundoi Kashami.