Zvicra eliminon Belgjikën
Përmbysin një ndeshje të çmendur dhe do luajnë gjysmëfinalet e Ligës së Kombeve
jë Ligë Kombesh me breshëri gola. Në mbrëmjen e djeshme, ky turne ofroi 20 gola në shtatë ndeshjet e luajtura, nga të cilët 7 u shënuan vetëm në duelin mes Zvicrës dhe Belgjikës, për Grupin A2. Shaqiri dhe Xhaka me shokë kontribuuan në një mbrëmje madhështore për helvetët, të cilët duke fituar përballë Belgjikës së talenteve të mëdhenj 5-2, arritën në këtë mënyrë që falë golavarazhit më të mirë në sfidat direkte ndaj “Djajve” të marrim kokën e grupit dhe kjo do t’u japë atyre të drejtën që të luajnë gjysmëfinalet e turneut.
NDESHJA – Në Lucërnë ka gola dhe spektakël. Zvicra arrin t’ia dalë të përmbysë dhe të fitojë ndaj Belgjikës “finalen” e grupit. Skuadrës së Petkoviçit i duhej një sukses me dy gola diferencë, ose një rezultat 1-0 për të marrë kreun e grupit, në një takim ku ndodhi gjithçka në pjesën e parë. Pas vetëm dy minutash, Belgjika kalon në avantazh me Torgan Hazard, i cili shfrytëzon një gabim në mbrojtje të rivalëve, ndërsa në të 17-ën vjen edhe dyfishimi për miqtë, ku është sërish vëllai i Edenit, ai që feston, pas një goditjeje fantastike dhe të fortë. Gjithsesi, reagimi i zviceranëve është heroik, sepse teksa Rodrigez ngushton në të 26-ën me penallti, Seferoviç barazon shifrat duke shfrytëzuar spondën e Shaqirit. Por helvetët nuk kënaqen me kaq, duke kaluar edhe në avantazh, në të 44-ën, sërish me gol të Seferoviçit. Në pjesën e dytë, Zvicra është edhe më agresive, duke dërguar në të 62-ën shifrat në 4-2 me Elvedin sërish, të frymëzuar nga një asist i Shaqirit, ndërsa gjashtë minuta nga fundi vjen edhe goli i sigurisë matematikore, i realizuar me kokë nga Seferoviç, që feston tripletën, merr topin në shtëpi, por mbi të gjitha i dhuron Zvicrës së shqiptarëve (Xhaka kapiten e Shaqiri nga minuta e parë, plus Albian Ajeti që zbriti në fushë, në minutën e 92- të) kokën e grupit.