Erzeni, drejt privatizimit
Drejtori i Sporteve, Astrit Hoxha: Shpresojmë që të bëhet sa më shpejt
Erzeni, drejt privatiz imit. Ky është lajmi që bën të ditur ekskluzivisht për gazetën "Panorama Sport", drejtori i përgjithshëm i Sporteve në Bashkinë e Shijakut, Astrit Hoxha, i cili vite më parë ka qenë president i skuadrës. Në një prononcim për gazetën, ai tregon se katër biznesmenë të mëdhenj kanë hyrë në bisedime me kryebashkiakun e Shijakut, Ardian Kokomani, për të blerë aksionet e klubit. PRIVATIZIMI
Së fundmi, në Shijak qarkullojnë informacione se tek Erzeni kanë shfaqur interes për t'u afruar biznesmenë të njohur me synimin për të krijuar një ekip të madh. I pyetur nëse ka diçka konkrete në lidhje me këtë çështje, Hoxha përgjigjet: "Populli thotë se 'ku ka zë, nuk është pa gjë'. Dhe në fakt, një interesim i tillë është prezent sepse katër biznesmenë të njohur, të cilët nuk mund t'i përmend me emra që tani, synojnë që të marrin klubin. Është fillimi i procesit dhe ata kanë shfaqur interesim serioz
për Erzenin. Madje, janë njohur me infrastrukturën, me nivelin e skuadrës dhe për ketë janë në bisedime edhe me kryebashkiakun Ardian Kokomani, i cili po tregon interes të veçantë për këtë bashkëpunim. Duke qenë mjaft seriozë në këtë afrim të tyrin,
kërkohet pa dyshim të vlerësohet blerja e aseteve të Erzenit, ku përfshihen disa elementë në infrastrukturë dhe të tjerë faktorë. Pra, nëse arrihet sa më shpejt të bëhet vlerësimi i këtyre aseteve, ata kërkojnë që të blejnë shumicën e aksioneve, çka do të çojë drejt privatizimit të
klubit. Shpresojmë që kjo të ndodhë sa më shpejt sepse do të bënte të mundur që tek Erzeni të hapej një faqe e re në historinë e tij".
ECURIA
Në lidhje me ecurinë e skuadrës në këtë fazë të parë ku ekipi është vetëm katër pikë larg Vllaznisë, drejtori shprehet: "Natyrisht, jam i kënaqur me këtë rezultat mjaft pozitiv të Erzenit në futboll, që u dedikohet futbollistëve në radhë të parë, stafit teknik dhe pa dyshim kryebashkiakut Ardian Kokomani që vazhdimisht ka qenë mjaft i përkushtuar. Më duhet të theksoj se arritja e këtij rezultati e ka fillesën që gjatë përgatitjeve të fazës verore, në disiplinën e lartë gjatë procesit stërvitor ku pa dyshim Gentian Stojku e ka justifikuar plotësisht punën e tij, sikundër dhe administratori Altin Keçi. Gjithashtu, duhet vlerësuar edhe puna e palodhur e trajnerit të portierëve Arian Hoxha dhe në përgjithësi e gjithë aktorëve". MERKATO
"4 ndeshjet e fundit të vitit mendoj se janë tepër të rëndësishme sepse duhet të na shërbejnë për të rikuperuar pikët e humbura dhe atëherë mund të themi se Erzeni do të jetë rival kryesor për të hyrë në Superiore. Dhe me fillimin e vitit të ri, Erzeni do të hyjë në merkato, ku ka si plan afrimin e 2-3 futbollistëve mjaft cilësorë", përfundoi Hoxha.