Sarri: Unë si Klop, në Angli kam gjetur perfeksionin
"Mou njeri i madh, më befasoi pas sherrit me asistentin"
Futbolli i tij po argë ton Anglinë, një komb konservator, tradicional dhe mosbesues. Ka treguar se filozofia e tij është e eksportueshme edhe në një kampionat të vështirë si Premier Liga. Rrugëtimi i Mauricio Sarrit në Londër është një histori e mrekullueshme sporti dhe jete. Dhe duke ndjekur një ëndërr, ishbankieri italian ka merituar respektin dhe admirimin në djepin e kapitalizimit dhe futbollit më të pasur të planetit. Në një intervistë për "Gazzetta Dello Sport", 59- vjeçari rrëfen aventurën e tij të deritanishme në "Stamford Bridge".
Klaudio Baljoni në vitet 1970 këndonte rroftë Anglia: e këndojmë akoma?
Unë për momentin gjendem shumë mirë. Atmosfera është fantastike, futbolli spektakolar dhe një trajner arrin që të argëtohet.
Ashtu si në Çelsi-Liverpul, kur shkëmbyet ndonjë batutë me Klopin?
Në një moment u ktheva drejt tij, i cili po më shikonte dhe qeshte. U afrova dhe e pyeta pse po qeshte dhe ai më tha: "Po argëtohem shumë, po ti"? "Edhe unë", iu përgjigja. Dhe kur përjeton këto situata, kupton që ke arritur në majë.
Katër muaj në futbollin anglez, bilanci?
Rezultatet, por edhe cilësitë e futbollit tonë japin tregues pozitivë. 18 ndeshje pa humbje, në një realitet kaq konkurrues si ky, tregojnë se kemi marrë rrugën e duhur.
Çfarë ka arritur Sarri dhe çfarë duhet ende që të përmirësohet?
Ajo që të bie menjëherë në sy këtu është futbolli i nivelit të lartë, brenda një kornize fantastike. Ka një pasion të pafund dhe për atë që kam parë deri tani, i shprehur në tonalitetet e duhura. Aspekti që duhet korrigjuar është çështja kohë. Hapësirat e ngushta kohore për stërvitjen nuk i ndihmojnë trajnerët dhe besoj edhe lojtarët. Nuk duhet menduar vetëm për aspektin fizik, por edhe për atë psikologjik.
Ka lojtarë të rilindur me Sarrin: David Luiz, Barklej, Uillian dhe tani edhe Morata.
Luiz më ka befasuar me disponueshmërinë dhe inteligjencën. Barklej ka gjetur vazhdimësinë pas një periudhe të gjatë dëmtimesh. Uilli është një lojtar me cilësi të jashtëzakonshme. Stili i tij i lojës është perfekt për Anglinë. Alvaro është një djalë me cilësi, i shpejtë dhe teknik. Është shumë i ndjeshëm dhe vështirësitë e kishin lënduar.
Rezultatet që po merrni konfirmojnë tezën se rruga që duhet ndjekur, është gjithnjë ajo e futbollit të bukur?
Kur vendosa që t'ia dedikoj jetën time sportit ishte që të argëtohesha vetë dhe argëtoja të tjerët. Kur skuadra të ndjek dhe arrin të aplikojë në fushë teoritë e mia, gjej një kënaqësi të pamasë. Dhe kur shoh që lojtarët dhe tifozët janë të gëzuar, çfarë mund të kërkoj më shumë?
Klop, Murinjo, Emeri rivalët e mëdhenj me të cilët jeni përballur: Përshtypjet tuaja?
Klop është ai që ndiej më pranë nga pikëpamja filozofike. Shkëmbimi i batutave mes nesh më duket shembulli më i mirë. Murinjo është një njeri me cilësi njerëzore të jashtëzakonshme. Më la një përshtypje të shkëlqyer ditën e ndeshjes në "Stamford Bridge" kur verifikoi episodin që përfshiu një nga asistentët e mi. Në planin profesional ka pak për të thënë: ka fituar gjithçka dhe kudo. Emeri është një trajner shumë i studiuar dhe një profesionist i shkëlqyer. Organizimi ofensiv i futbollit të tij është i nivelit shumë të lartë.