Zhbllokohet Kale, Gjici: Luan kur të marr unë lekët
Idrizi: Falënderoj Gjicin, në janar prisni një superblerje
Merr fund “telen ovela”, Elton Kale është zyrtarisht lojtar i Flamurtarit. Historia që zgjati pesë muaj vjen tashmë me një fund të lumtur për lojtarin brazilian dhe klubin vlonjat. Edhe pse ka humbur jo pak, por 13 ndeshje të këtij kampionati, Kale do të jetë zyrtarisht nën urdhrat e Ilir Dajës duke filluar nga takimi i radhës ndaj Partizanit. Marrëveshja mes klubit të Kukësit dhe Flamurtarit u arrit gjatë ditës së djeshme, ashtu siç dhe kishte paralajmëruar “Panorama Sport”. Menjëherë klubi kuqezi ka prezantuar Kalenë në faqen zyrtare në “Facebook”, duke konfirmuar se do të jetë gati të premten ndaj Partizanit. Ky është një lajm i mirë për trajnerin Daja, duke pasur parasysh faktin se mungon sulmuesi tjetër brazilian, Danilo Alvesh. Gjithsesi, Kale ka pesë muaj që nuk aktivizohet në një ndeshje zyrtare, paçka se është stërvitur rregullisht dhe ka kryer një fazë përgatitore të plotë me Flamurtarin. Kontrata që ka firmosur braziliani është 1vjeçare me të drejtë rinovimi edhe për një sezon. Pas zgjidhjes së kësaj çështjeje mes presidentëve të dy klubeve, Sinan Idrizi dhe Safet Gjicit, lojtari është shprehur shumë i entuziazmuar që më në fund do të ketë të drejtë të luajë. “Jam i lumtur që u arrit një marrëveshje. Më në fund do të mund të aktivizohem me Flamurtarin. Normalisht që ishte një situatë jo e mirë ajo që po kaloja për shkak se nuk dija se si të veproja. Stërvitesha, por vetëm kaq. Tani jam plotësisht i gatshëm për të dhënë maksimumin tim në të gjitha ndeshjet që do të aktivizohem për Flamurtarin”, deklaroi Kale dje për gazetën. Braziliani është futur në listën e federimit të Flamurtarit, por çështja kaloi në Dhomën e Zgjidhjes së Konflikteve dhe kjo e fundit la pezull gjithçka. Tashmë Kukësi ka paraqitur një shkresë në FSHF, ku konfirmon se Kale nuk ka më asnjë detyrim me klubin verilindor.
IDRIZI - Administratori i Flamurtarit, Sinan Idrizi, falënderoi përmes “Panorama Sport” presidentin e Kukësit, Safet Gjici, pas zgjidhjes së çështjes së lojtarit. “Ishte një mirëkuptim mes dy klubeve. U gjet një vijë e artë për të dyja palët. Falënderoj presidentin e Kukësit, Safet Gjici, për mirëkuptimin dhe xhentilesën që tregoi. Unë nuk merrem
me shuma, sepse më pas i harroj dhe nuk të kthej dot përgjigje. Me punë parash unë nuk merrem. Unë falënderoj edhe një herë Gjicin për mirëkuptimin që tregoi. E mbyllëm ciklin me këtë zotërinë, tani do të kemi histori të tjera. Në janar do të kemi një superblerje. Unë e kam thënë dhe e përsëris që
Flamurtari dhe Kukësi këtë vit janë për kampionë. Ose ne, ose Kukësi janë për kampionë këtë sezon. Të tjera janë histori koti”, është shprehur kreu i klubit vlonjat.
KUKËSI - “Lufta” e Kukësit nuk ishte thjesht se një lojtar donte të largohej dhe ata nuk e lëshuan, por më e gjerë se kaq. Beteja ishte ligjore dhe
bien poshtë pretendimet për kontrata të falsifikuara apo të jashtëligjshme. Kale akuzoi Kukësin se ishte falsifikuar firmën, por situata dhe ngjarjet i japin të drejtë klubit. I vetmi rast që Kukësi ka humbur për kontratat është me ishsulmuesin Izair Emini, teksa beteja shkoi në FIFA dhe kjo e fundit i dha të drejtë lojtarit.