Kosova në histori, thyen azerët dhe e mbyll në krye

Zeneli me 3 gola dhe Rrahmani shkërmoqin azerët në "Fadil Vokrri"

Dy vite pas pranim it në FIFA, Kosova shkruan historinë në futbollin ndërkombëtar, ku me fitoren 4-0 ndaj Azerbajxhanit kanë siguruar vendin e parë në Grupin 3 të Ligës D të Ligës së Kombeve. Heroi i kësaj fitoreje ishte Arbër Zeneli, që shënoi tregolësh në këtë takim. Fadil Vokrri nuk jeton, por në stadiumin që mban emrin e legjendës së futbollit kosovar dhe presidentit të parë të Federatës së Futbollit të Kosovës, mbrëmë "Dardanët" kanë realizuar një nga ëndrrat dhe aspiratat e tij. Me në krye trajnerin Bernard Shaland, përfaqësuesja kosovare hedh një hap të madh dhe tani pret të përballet me Maqedoninë në raundin "play-off" të Ligës D të Ligës së Kombeve. Përballja me Maqedoninë do të luhet në Shkup, ndërsa Gjeorgjia, si ekipi me arritjet më të mira në Ligën D, do të përballet me Bjellorusinë, që në renditjen e kësaj lige u rendit e katërta, pas Maqedonisë dhe Kosovës. Fituesit e çifteve MaqedoniKosova dhe GjeorgjiBjellorusi do të diskutojnë më pas finalen për të siguruar biletën kualifikuese për në Kampionatin Europian të 2020-ës. Gjithsesi, Kosova ka shkruar një faqe të lavdishme në histori si përfaqësuese në futbollin ndërkombëtar.

NDESHJA- Kosovës i mjaftonte një pikë ndaj Azerbajxhanit,

por në një atmosferë festive dhe elektrizuese që kishin krijuar tifozët kosovar në stadiumin "Fadil Vokrri, "Dardanët" morën një fitore të madhe, 4-0. Trajneri Shaland surprizoi me zgjedhjet e tij, pasi porta iu besua 20vjeçarit të Mançester Sitit, Arijanet Muriçi, duke ulur në stol kapitenin Samir Ujkani.

Takimi nisi vrullshëm për "Dardanët", pasi e gjejnë golin që në minutën e dytë. Benjamin Kololli jep një asist për Zenelin, i cili me një goditje mjeshtërore zhbllokoi rezultatin, 1-0 për Kosovën. Pas golit Azerbajxhani mori iniciativën, por Kosova kontrolloi gjithçka. Goditjen e parë në portë në pjesën e parë

azerët e kryen në minutën e 40-të, por portieri Muriçi kontrollon topin. Pjesa e dytë nisi njëlloj si e para, pasi pa kaluar minuta e pestë shënon sërish Kosova dhe protagonisti është i njëjtë, Arbër Zeneli. Vedat Muriqi shërben për Zenelin, i cili me qetësi e çon rezultatin në 2-0. Në minutën e 61të, Kololli lëshon një harkim në zonën mike dhe Rrahmani me kokë e dërgon topin në rrjetë, 3-0 për Kosovën. Pas këtij goli ka festë te Kosova dhe trajneri në vijim kryen edhe tre zëvendësimet, duke freskuar ekipin me Nuhiun, Zhegrovën dhe Halimin. Në minutën e 76-të Zeneli me një tjetër gjuajtje mjeshtërore shënon një supergol, duke vulosur suksesin e tij personal dhe të Kosovës.