Teuta rikthehet në shtëpi, fitorja si detyrim
Para Luftëtarit, skuadra e Bledi Shkëmbit nuk vuan dëmtime apo pezullime lojtarësh
Teuta më në fund rikthehet të luajë një takim në shtëpinë e saj. Shtegtimit i ka ardhur fundi dhe pas 48 ditëve skuadra bregdetare do presë në “shtëpinë” e saj Luftëtarin. Për afro dy muaj, Teuta ka zhvilluar pesë takime jashtë shtëpisë së saj duke arritur të marrë tri fitore dhe dy barazime, duke shënuar dhjetë gola e pësuar vetëm katër gola. Ajo që ishte konsideruar si frika më e madhe e skuadrës u kthye në pikën e saj më fortë. Tani pritet me interes sesi do të reagojë përpara publikut vendës ndaj një kundërshtari që ka ardhur në rritje, por që dhe fitoren e saj të parë në këtë edicion ia mori pikërisht Teutës. Pas ndeshjes me Kastriotin në stadiumin “Niko Dovana”, u zhvilluan tri takimet e vlefshme për eliminatoret e Euro 2019, për 19-vjeçarë, ku Kombëtarja jonë e kësaj moshe zhvilloi pikërisht tri takime në qytetin e Durrësit në harkun e nëntë ditëve. Ishte pikërisht kjo që i dha “goditjen” përfundimtare tapetit të fushës, duke e rënduar së tepërmi gjendjen. Më pas ishte e paevitueshme ndërhyrja dhe drejtuesit vendosën të mos humbnin më kohë. Fusha sot gëzon një gjendje “të shëndoshë” dhe ka marrë formën që duhet dhe kjo shihet dhe te vetë lojtarët e skuadrës, që mezi presin të riluajnë në shtëpinë e tyre. Të shtunën luhet një ndeshje shumë e rëndësishme dhe në kampin durrsak çdo takim tani ka rëndësinë e një “finaleje”. Jo vetëm dëshira për fitore, por në vetvete ky takim është dhe për të bërë autokritikën dhe për një hakmarrje për atë humbje të fazës së parë. Përballë gjirokastritëve, bregdetarët kanë thuajse një vit të plotë pa fituar, kur fitorja e fundit daton në nëntorin e vitit të kaluar, 2- 3 në Gjirokastër.
STATISTIKAT - Në 20 vitet e fundit ky do të jetë takimi i 23 midis të dyjave skuadrave. Në 22 ndeshjet e zhvilluara, të gjitha në kampionat, Teuta ka arritur të fitojë 10 takime, ndërsa Luftëtari ka arritur t’u rrëmbejë “bregdetarëve” 8 fitore dhe 4 ndeshje janë mbyllur në barazim, me një golavarazh 32-24 në favor të “Djemve të Detit”. Në “Niko Dovana” skuadra e Teutës është tërësisht dominuese, ku në 11 ndeshje, ka fituar tetë, humbur dy dhe barazuar një, me golavarazh të frikshëm 23-7. Anarildo Alia