Ibrahimoviç dhe Vidal, Milani nis manovrat e mëdha
Afrohet suedezi, nën vrojtim 4 mesfushorë dhe dy mbrojtës
Me pesë titullarë që kanë mbyllur vitin dhe nuk dihet kur riaftësohen, nevojat e Milanit për përforcime janë më se të dukshme. Zlatan Ibrahimoviç afrohet edhe më shumë, teksa duket çështje kohe arritja e një akordi. Në pritje të zhvillimeve mbi suedezin përveç tifozëve, është edhe Alesandre Pato. Braziliani duket gjithnjë e më i lodhur nga kampionati kinez dhe do të ishte i gatshëm të ulej në bisedime për një rikthim të mundshëm te kuqezinjtë.
DIGA – Me dëmtimet e Bilias dhe Bonaventurës, mesi i fushës është zona ku Milani kërkon ndërhyrje sa më shpejt. Dyshja e sipërpërmendur ishin truri dhe fantazia e skuadrës, që tani është kapur thuajse e gjitha pas së majtës së Susos e golave të Higuainit. Çalhanoglu duket një trup i huaj, ndërsa Kesi dhe Bakajoko janë shumë muskulozë për t’i kërkuar finesë. Nga këtu, merr nismë lista me emra për mesfushën e “Djallit”. Leandro Paredes (ish-Roma e Empoli) do të kthehej me vrap në Itali nga Shën Pjetërburgu, por Zeniti e lejon për vetëm 25 milionë euro. Të njëjtën shumë kërkon edhe Sasuolo për talentin Sensi, që shkëlqeu dy net më parë me Italinë kundër SHBA-ve. Fabregasi favorizohet nga mosha dhe kosto për të lëvizur më me lehtësi, por spanjolli duket më shumë një zgjedhje emergjente sesa e besueshme. Arturo Vidal është profili që do vinte dakord tifozërinë, Gatuzon dhe drejtuesit, por për ta sjellë në Milano duhet një sforco ekonomike dhe ndihma e Ariedo Braidës, drejtor te Barcelona.
PRAPAVIJA – Rikthimi i kapiten Romanjolit, në rastin më të mirë do të ndodhë pas një muaji, por duke parë ambiciet e lidhura me vendin e katërt, drejtuesit e Milanit nuk mund të rrezikojnë në merkato. Leonardo dhe Maldini po studiojnë pistat që të çojnë drejt Rodrigo Kaios dhe Andres Kristensenit. Nëse për brazilianin është folur edhe për çmime (10 milionë euro), mbrojtësi i Çelsit është diçka më shumë se një hipotezë sugjestionuese. I përdorur me pikatore nga Mauricio Sarri që preferon David Luizin dhe Rudigerin, djaloshi i rritur në fidanishtet e “Bluve” nuk do të kundërshtonte një ambient si Milani ku mbase do të kishte më shuam shanse për të kapur formacionin pas morisë së dëmtimeve që ka kapluar prapavijën e “Djallit”.