Argjentina, Ikardi “thumbon” Mesin pas golit
Guardiola krenohet këtë vit me mbrojtjen më të fortë në Angli
Ekush tha që epoka e "tiki-taka"-s ka perënduar? Mançester Siti i Pep Guardiolës ka sot, së bashku me Liverpulin, mbrojtjen më të mirë në Angli (5 gola të pësuar) dhe trajneri katalanas arrin ta maskojë repartin më problematik të skuadrës, përmes armës së tij më të fortë, zotërimit të topit. Kampionët e Anglisë janë një nga skuadrat që e mban më shumë topin në Premier Ligë këtë sezon 67.57% dhe porta e Edersonit është tentuar të goditet 78 herë ( përfshirë edhe gjuajtjet e bllokuara). Asnjë nga ekipet e tjera të Premier Ligës nuk zbret nën 100 goditje. Mbrojtja e dytë më e paprekshme është ajo e Jyrgen Klopit, i cili ndonëse e mban topin më pak se "Qytetarët", vetëm 57.99%, pasqyra e Alisonit është goditur vetëm 100 herë. Vetëm dy goditje më shumë ka pësuar Kepa Arrizabalaga, duke konfirmuar soliditetin e mbrojtjes së Mauricio Sarrit, Çelsi i të cilit thyen Mançester Sitin këtë sezon sa i përket zotërimit të topit ( 67.75%). Zhoze Murinjo, i njohur për cilësitë defensive të skuadrave të tij, ka pësuar në këto 12 javë 153 goditje, ndërkohë që përpara tij ka skuadra si Uotfordi, Evertoni, Leiçesteri, Uolvesi dhe Totenhemi.
PORTA - Trajneri legjendar i Notingem Forestit, Brajan Klaf, deklaronte gjithnjë se portieri ishte lojtari më i rëndësishëm i skuadrës së tij dhe një gjë të tillë mund ta konfirmojë edhe Jyrgen Klop në ditët e sotme. Me Loris Kariusin dhe Simon Minjolenë sezonin e shkuar, porta e Liverpulit ishte në alarm, por me Alisonin ata duket se kanë gjetur garancitë. Nëse i pagabueshmi Van Dajk qëllon që është në një ditë të keqe, atëherë dorezat e brazilianit mund të zgjidhin një situatë të pakëndshme. Portieri më i shtrenjtë i historisë së futbollit është i dyti më i mirë në Premier Ligë kur vjen fjala te përqindja e pritjeve (83.33%). Pas tij renditet portieri i Sitit, bashkatdhetari i tij Ederson ( 79.17 %). Vendin e parë e mban gardiani i Totenhemit, Hugo Loris, i vetmi që pret më shumë se 86.11% të goditjeve të kundërshtarit.