Suksesi i Besës nis nga porta, makth për rivalët
avajasit kthejnë traditën e promovimit të "gardianëve"
Ata janë gjithmonë pas kuintave, nuk flasin, nuk i bien gjoksit, por stërvitin pikën më të fortë të çdo ekipi. Po flasim për trajnerët e portierëve, të cilët djersijnë shumë, por që jo pak herë puna e tyre nuk përmendet. I tillë është edhe Kastriot Rama, trajneri i portierëve të verdhezinjve. Besa i është rikthyer traditës së lavdishme të hershme kur nga gjiri i saj dolën korifenjtë e portës verdhezi e futbollit kombëtar. Emra si Qamil Teliti, Qemal Vogli, Sulejman Maliqati, Shefqet Topi, Haki Arka @ hiu dhe të tjerë bënë emër në Kavajë, te Partizani e Kombëtarja. Aktualisht, Besa ka 2 portierë, Festim Mirakën dhe Ilir Dobjanin. Në 9 javë kampionat, verdhezinjtë kanë pësuar vetëm 4 gola, çka tregon se mbrojtja dhe porta janë të konsoliduara. Pas Vllaznisë me tre gola, Besa është ekipi i dytë që ka pësuar më pak, 4 gola në të gjithë Kategorinë e Parë. PORTA
Në një prononcim për gazetën, trajneri Kastriot Rama tregon sekretin e kësaj ecurie. "Ne stërvitemi veçmas grupit dhe sytë e të gjithëve në fakt janë te grupi. Puna jonë është mjaft e lodhshme dhe specifike, por që testohet vetëm në ndeshje. Besoj se e keni vënë re se kur një sulmues gabon fatalisht para portës thonë të gjithë ' hë se bën golin rastin tjetër'. Me portierët ndodh ndryshe dhe një gabim i tyre çon dëm gjithë lojën e grupit. Thuhet se portieri është gjysma e ekipit, por unë mendoj se është më shumë. Kemi dy portierë të shkëlqyer ku përvoja është gërshetuar me talentin dhe perspektivën. Miraka dihet se çfarë cilësie, por edhe Ilir Dobjani besoj se është ndër portierët më të mirë të moshës së tij në Shqipëri. Madje, habitem sesi trajnerët e kombëtareve të moshave nuk e vlerësojnë këtë talent. Besa fitoi vjet çdo trofe me U-17 dhe kryesori në këto arritje ishte Dobjani. Personalisht besoj se porta e Besës është e sigurt sot me Mirakën, por do vijojë të jetë po kaq e sigurt nesër me Dobjanin", tha Rama. Pas Mario Dajsinanit dhe Bruno Pujës, Dobjani është një tjetër portier i ri që jep siguri.