Bylisi merr kreun dhe kërcënon Besën, Egnatian e “lë nafta”
Në Ballsh, Bylisi ka bërë më së miri detyrën, madje duke treguar diferenca në lojë dhe kualitete me Egnatian. Skuadra e trajnerit Dovedan ka mundur 2-0 ekipin rrogozhinas falë golave të Bejit dhe Peposhit dhe kështu merr përkohësisht vendin e parë, duke qenë se Besa pret nesër në “shtëpi” Pogradecin.
NDESHJA
Bylisi e nis në sulm me aksione të bukura e të shpejta. Skuadra e trajnerit Veljko Dpovedan dallohet për zbritjet e shpeshta në portën rrogozhinase, madje ballshiotët të japin përshtypjen se do të bëjnë goleadë. Por, duket se janë të pasaktë si Beji ashtu edhe Kofi. Secili ka pasur nga dy raste për gol. Nga ana tjetër, rrogozhinasit nuk e kanë pritur këtë sulm të Bylisit dhe janë mbrojtur me forca të shumta. E madje, për të ulur edhe vrullin e lojës së vendësve, janë përpjekur që edhe të frenojnë aksionet e Bylisit, duke vonuar edhe lojën në përplasjet me vendësit, duke u shtrirë për të përfituar minuta. Kjo nuk u ka pëlqyer ballshiotëve që disa herë i janë drejtuar gjyqtarit kryesor për të ndëshkuar miqtë. Pjesa e parë mbyllet 0-0, ndonëse duhet theksuar avantazhi i shpeshtë i vendësve. Në pjesën e dytë, Bylisi është hedhur i gjithi në sulm pas udhëzimeve të trajnerit Dovedan. Një aksion i bukur me këmbëngulje është Beji që shënon me një top të gjuajtur në dy kohë drejt portës dhe ka 1-0. Ballshiotët me futjen e Muratajt marrin më shumë gjallëri në sulm dhe shënojnë golin e dytë. Nga një asist i Valentino Muratajt është Peposhi që gjuan bukur dhe shënon duke i çuar shifrat në 2- 0. Bylis rikthehet kështu te fitorja në fushën e vet,
ndërsa Egnatia nuk ka fuqi që të gjejë as golin e nderit në Ballsh. Me këto 3 pikë në fushën e vet, Bylisi është në krye, duke qenë se Besa luan sot dhe ballshiotët presin me interes rezultatin e sfidës që zhvillohet në Kavajë. Erjon Saliu