"Bejlin e futëm në xhep, ju tregoj Grezdën kundërshtar"
Ardian Ismajli duket se e ka fituar vendin e tij në Kombëtare. Falë besimit të Panuçit, pas Skocisë pati një shans edhe ndaj Uellsit, ku bëri një paraqitje pozitive. I rikthyer te Hajduk Split, shqiptari tregon se nuk ndien lodhje, por motivim për të qenë protagonist edhe në kampionatin kroat. "Jam gati për takimin ndaj Slaven Belupos dhe na duhet të fitojmë. Nuk jam unë që e caktoj se kush luan dhe do të jetë trajneri që do ta vendosë nëse do të jem apo jo në fushë. Për sa i përket së ardhmes, jam i përqendruar tek ekipi im dhe të grumbullojmë sa më shumë pikë", shprehet fillimisht mbrojtësi.
GARET BEJL - Ai gjithashtu tregon edhe për jetën e tij në Split, por edhe për sfidën ndaj Garet Bejl. "E futëm në xhep Bejlin dhe jam i lumtur. Kam luajtur mirë dhe këto janë momentet më të mira të karrierës sime, ndaj falënderoj Zotin për durimin. Besimi më ndihmoi të përkushtohem dhe punoj për periudhën e vështirë kur nuk isha as në pankinë. Panuçi ishte ai që insistoi që të zgjidhja Shqipërinë", shprehet 22-vjeçari për "Slobodnadalmacija". KOSOVA - Nuk mund të mungonte as pyetja për largimin nga Kosova. "Një komb, dy shtete dhe fare pak ndryshim. Me Shqipërinë luajnë shumë lojtarë nga Kosova dhe e kundërta. Megjithatë, kur u largova nga Kosova u fol shumë. Panuçi insistoi shumë për të më bindur. Isha kapiteni i U-21 të Kosovës në barazimin historik 0-0 kundër Gjermanisë, por nuk më llogarisnin për ekipin përfaqësues A. Çdokush ka preferenca dhe Panuçi më donte", vijoi ai.
KROACI - Mbrojtësi flet edhe për fenë dhe tre kundërshtarët më të vështirë në kampionatin kroat. "Jam mysliman dhe falem pesë herë në ditë. Në Split nuk ka xhami, por në qendër të qytetit ekziston një hapësirë ku mund të falemi. Besimi është diçka shumë e rëndësishme e jetës sime, më jep fuqi dhe më ndihmon në momentet e vështira. Tre kundërshtarët më të vështirë kanë qenë Zhunior Fernandez, Mario Gavranoviç dhe Eros Grezda", ka deklaruar Ardian Ismajli.